Zygmarr

myndaflutt

2006-12-26T22:50:00.000Z

Enn að ruglast

2006-11-17T21:12:00.000Z

Fjandakornið. Þetta er farið að verða verulega þreytandi. Ennþá ráfar þú hingað inn einsog áttavillt heiðagæs þótt ég sé fluttur fyrir lifandis löngu. Drífa sig hingað. Breyta hlekkjum og favorites. Takk.

sigmarg.blog.is

Enn fluttur.

2006-11-12T23:02:00.000Z

Hallóóó. Af hverju ertu enn að villast hingað inn. Ég er fluttur á þennan stað og þar blogga ég frammvegis. Vonandi þarf ég ekki að tyggja þetta ofan í þig.

Ef þú ert með hlekk á mig á blogginu þínu, vinsamlegst uppfærðu hann fyrir mig. Breyttu svo heimilisfanginu í favorites.

sigmarg.blog.is

Fluttur.

2006-11-12T01:42:00.000Z

Er fluttur. Hér blogga ég framvegis. Ykkur er boðið að kíkja í heimsókn. Vinsamlegast vistið nýja blogheimilisfangið mitt í stað þess gamla. Breytið hlekknum líka ef þið eruð með hlekk á mig. Takk, elskurnar

sigmarg.blog.is

Ræktaður rasismi

2006-11-09T10:25:00.000Z

Á Íslandi býr þjóð sem síðustu áratugi hefur sannfært sjálfa sig um að hér sé fallegasta náttúran, besti landbúnaðurinn, hreinasta loftið, fallegasta kvennfólkið og mesta gróskan. Á góðum stundum höfum við meira að segja sannfært okkur um að við séum fremri öðrum í fótbolta og Júróvisjón og við rennum ekki niður vatnssopa nema sú hugsun fylgi að hátveiroið okkar sé betra en hátverio í útlöndum. Það er búið að tala svo mikið um glæsileika þjóðarinnar, menntun hennar og mannauð að það er ekkert skrítið þótt útlendingarnir séu litnir hornauga af stórum hluta þjóðarinnar.

Hvað eru það annað en rasismi í Guðna Ágústssyni þegar hann segir að Íslenskur landbúnaður sé sá besti í heimi. Hefur hann smakkað paprikur, lambalærissneiðar og skólajógúrt frá öllum löndum í heiminum? Er eitthvað á bak við þessa grænmetisþjóðhyggju? Nei. Þetta eru alhæfingar, byggðar á fordómum og frösum. Guðni er gulrótarrasisti.

Hvað er það annað en rasismi þegar sumir náttúruverndarsinnar fullyrða án nokkurs fyrirvara að Ísland sé fallegra en önnur lönd. Hafa þeir skoðað öll önnur lönd? Alla firði í heimi, eyjar, eyðimerkur, sléttur, dali og fjöll. Nei. Þetta eru alhæfingar fólks sem einungis hefur séð brotabrotabrotabrot af veröldinni. Þetta eru orð náttúrurasista. Heimskuleg þjóðremba.

Hvað eru það annað en rasismi þegar fullyrt er að íslenskar konur séu fallegri en útlenskar konur, einsog oft heyrist. Hvernig er þetta mælt? Hefur einhver séð allar konur á Íslandi? Eða allar útlenskar konur í heiminum? Nei. Þetta eru alhæfingar um huglæga og ómælanlega hluti. Og alhæfingarnar byggja á þjóðerniskennd.

Þetta er nákvæmlega sama hugsun og að íslendingar almennt séu betri en annað fólk.

Íslendingar hafa í takmarkalausri minnimáttarkennd á síðustu áratugum ræktað í sér rasismann með belgingslegu tali um eigin yfirburði og ágæti. Hér hefur verið plægður svo frjór akur fyrir þjóðernishyggju að löngu áður en innflytjendamál eru orðin að rauverulegu vandamáli einsog í grannríkjunum, fær Frjálslyndi flokkurinn ótrúlega útkomu í skoðanankönnunum.

Landsbjörg, siðareglur og Southend

2006-11-08T00:19:00.000Z

Hvernig stendur á því að slysavarnarfélagið Landsbjörg byrjaði nú nýverið að vísa fjölmiðlum á Jón Gunnarsson framkvæmdastjóra í fréttatilkynningum sínum, í stað þess að beina þeim einvörðungu á Ölöfu Snæhólm upplýsingafullrúa félagsins einsog venja er? Varla vegna þess að Jón er í miðri prófkjörsbaráttu? Er við hæfi að Jón auglýsi baráttu sína merktur Landsbjörgu í bak og fyrir? Er Landsbjörg hafin yfir flokkadrætti eða gengin í Sjálfstæðisflokkinn? Get ímyndað mér að fólk vilji vita þetta áður en það ákveður af hverjum það kaupir jólatré og flugelda í desember.
---

Soldið hefur borið á því að nafnlaust fólk úðar fordómum og sleggjudómum í allar áttir í kommentakerfinu mínu. Þetta er vandamál sem flestir bloggara þekkja nokkuð vel. Ég er lítið fyrir að ritskoða svo ég bið ykkur, elsku lesendur, að hafa sígildar siðareglur Zygmarrs í huga þegar þið tjáið ykkur um menn og málefni hér á síðunni. Þær hljóða svona:

1 Ef þið eruð ómálefnaleg við aðra, reynið þá að vera það á málefnalegan hátt.

2. Ef þið talið illa um Zygmarr, gerið það þá fallega og af virðingu.

3. Ef þú heitir Jakob Bjarnar, reyndu þá að hafa kommentin styttri en skáldsögurnar hans Hallgríms Helgasonar.
---

150 kílóa kraftajötunn tapar fyrir lítilli stúlku í sjómann. Fyndið.
Þórhallur Gunnarsson kemst ekki út að reykja í heila klukkustund. Mjög fyndið.
Manchester United tapar fyrir Southend í fótboltaleik. Mig skortir orð.

Ömmi og Bingi

2006-11-06T20:39:00.000Z

Ögmundur Jónasson er stjórnmálamaður sem talar í lausnum. Hann vill senda bankana og starfsmenn þeirra úr landi til að auka jöfnuð í samfélaginu. Þetta er frábær hugmynd hjá Ögmundi. En það er líka hægt að fara aðra leið að sama marki þótt Ögmundi hafi ekki dottið hún í hug. Það er hægt að flytja þá launalægstu úr landi og ná þannig fram meiri jöfnuði. Eða á bara annar hópurinn tilverurétt í fyrirheitna landinu? Svo er náttúrulega líka hægt að flytja karlmenn úr landi og útrýma þar með á einu breytti launamun kynjanna. Sama markmiði má reyndar ná með því að flytja konur úr landi en slíkur málfluttningur yrði fljótt afgreiddur sem karlremba. Fleiri lausnir, Ögmundur?

Mér finnst þetta alls ekki nógu nákvæm frásögn af debútti Björns Inga Hrafnssonar á Alþingi. Pétur hefði mátt gera grein fyrir áru varaþingmannsins þegar lestur fyrsta andsvars hófst. Og hvort skipti hann í miðju eða greiddi létt útá vinstri hlið? Gat Pétur ekki greint hvernig skóm háttvirtur Bingi var í eða gleymdist það í geðshræringunni:) Og takið eftir litla orðinu "loksins" þegar rætt er um að Jónína hafi farið í frí.

Atkvæðaveiðar

2006-11-04T20:48:00.000Z

Ungur maður sem ég þekki vel hefur í dag og í gær gert fátt annað en að taka á móti sms skilaboðum vegna prófkjörs Samfylkingarinnar. Hann hefur verið ákaft hvattur af Samfylkingarfólki í kraganum til að mæta á kjörstað og hefur fengið vel á þriðja tug sms skilaboða. Það væri svosem lítið við þetta að athuga ef ekki væri um að ræða 11 ára gamlan fósturson minn, hann Sindra. Þeir stjórnmálamenn sem eru svo desperat að reyna að véla ófermt barnið í prófkjörsslaginn eru Jakob Frímann, Sandra Franks, Katrín Júlíusdóttir, Þórunn Sveinbjarnar, Magnús Norðdahl, Gummi Steingríms, Gunnar Svavarsson, Kristján Sveinbjörnsson, Anna Sigríður Guðnadóttir og Bjarni Gaukur Þórmundsson. Flestir hafa sent fleira en eitt sms. Sniðugast fannst mér smsið frá Bjarna Gauk til ellefu ára sonar míns þar sem stóð “Setjum börn og unglinga í fyrsta sæti með því að setja Bjarna Gauk í 7-8 sætið”. Láttu bara barnið mitt í friði, Bjarni Gaukur!

Sindri er vinsæll hjá Samfylkingunni því á síðast kjördag var hann boðaður á kosningavökufylleri um kvöldið klukkan 21:30. Hann komst því miður ekki því hann var að leika sér með tindátana sína.

Það fyndnasta við þetta er samt að Sindri hefur ekki snefil af pólitískum áhuga. Honum fannst þessi sms stórskotahríð Samfylkingarinnar óþægileg því hún truflaði hann við að komast á milli pláneta í Ratchet and Clank playstation leiknum. Einnig hefur hann frétt einhverstaðar að Samfylkingin vill lengja skólaárið og slíkur flokkur á ámóta mikið uppá pallborðið hjá Sindra og grænmetisát.

Að lokum vil ég biðja Samfylkingarfólk í prófkjörsham afsökunar á að Katla (sjö mánaða) og Salka (þriggja ára) eru símalausar sem stendur. Ef Samfylkingafólk þarf að koma til þeirra
einhverjum áríðandi pólitískum boðskap þá er hægt að gera það í kommentakerfinu hér að neðan.

Við munum öll....

2006-11-04T01:23:00.000Z

Nú eru einhverjir sérfræðingar búnir að reikna það út að allur fiskur verði horfinn úr hafinu árið 2048. Ekki 2047. Eða 2049. Nei, sushi heyrir sögunni til árið 2048 þótt það fylgi ekki sögunni í hvaða mánuði! Ég get ímyndað mér að kjósendur Frjálslynda flokksins séu óhressir með þessa spá, því samkvæmt þeirra málflutningi átti kvótakerfið hans Halldórs að stúta lífríki hafsins og vistkerfi sólkerfisins á enn skemmri tíma. Sjálfur tek ég þessu með stóískri ró þar sem ég er fyrir löngu orðin bólusettur fyrir þessum bölmóðs og heimsendaspám sem virtustu vísindamenn í heimi demba í sífellu yfir okkur.

Ég lifði af súra regnið og kalda stríðið. Það er líklegra að ég fái hrossaexem heldur en fuglaflensu. Bílastæðavandinn í miðbænum olli mér meiri skakkaföllum en 2000 vandinn. Þágufallsýki er í dag alvalegri heilsufarsvandi á Íslandi en HABL lungnabólgan sem átti að strádrepa allt kvikt fyrir nokkrum misserum. Ég ætla því að leyfa mér að draga í efa að síðasta rækjan hrökkvi uppaf um miðja öldina.

Í gærkvöldi voru þau Sigga Klingenberg spákona og Eiríkur Norðdahl skáld í Kastljósi að ræða fréttir vikunnar. Eiríkur var með hattinn sinn fræga og Sigga var með eitthvað fjaðradót og jólaskraut sem danglaði frístæl uppá hausnum á henni. Skyndilega fannst mér reiðhjólahjálmurinn minn töff.

Pönkhnakkar og Seljan

2006-11-02T23:55:00.000Z

Samkvæmt Fréttablaðinu er allt brjálað vegna þess að Ásgeir Kolbeinsson yfirhnakki og Arnar Gauti tískulögga voru með svo mikin sorakjaft og pönkaraattitjúd í Innlit/Útlit um daginn. Ég sá ekki þáttinn en mér finnst þetta ámóta trúlegt og að móðir Theresa og Óli lokbrá hafi framið raðmorð í miðbænum um helgina með heróínsprautu í handleggnum. Þessi prúðmenni hafa í mesta falli gengið framaf Arnari Grant fyrir að vera ekki nógu gulir.

Mér þykir leiðinlegt að drepa góða kjaftasögu. En geri það samt. Það var ekki Símon Birgisson, blaðamaðurinn ógurlegi, sem fékk listræna útrás með því að skvetta gulum vökva úr skinnsokk sínum yfir sprund í listaháskólanum einsog hann er sakaður um hér. Hann er algerlega saklaus af því. Hann hinsvegar sat í umræddri kennslustund og fylgdist með af barnslegri forvitni.

Mér finnst bæði rétt og skylt að greina frá því hér að Helgi Seljan, umsjónarmaður Kastljóssins, kláraði að naga alla blýantana hans Ara Edwald, forstjóra 365, í gær. Forstjóri 365 lætur Kastljósmanninn væntanlega flokka rykkorn í dag. Fylgist með daglegum fréttum hér á síðunni af ævintýrum Kastljóssmannsins sem fær ekki að fara burt frá NFS.

Græni kallinn, fótboltakallinn og Seljan kallinn

2006-11-02T01:37:00.000Z

Græna staðalímyndin í gönguljósunum verður bráðlega kominn í kjól ef Bryndís Ísfold fær sínu framgengt. Ég verð þó að játa á mig þá fávisku að hafa ekki haft hugmynd um að ég væri nánast að brjóta jafnréttislög í hvert sinn sem ég rölti yfir götu. En ég styð heilshugar þessa hugmynd Bryndísar, enda hefur hún allt sem prýða þarf góða hugdettu. Hún er frumleg, það er hægt að gera stólpagrín af henni en jafnframt ómögulegt að mæla gegn henni nema með ódýrum fimmaurabröndurum. Með hvaða rökum ætlar fólk í mannréttindanefnd að greiða atkvæði gegn þessu? Af hverju má kallinn ekki vera kona?

Sumir kalla hann Henrí. Aðrir Onrí. Sumir Henri. Enn aðrir kalla hann Honrí. Og eftir því sem framburðarsnillingunum fjölgar styttist væntanlega í að hann verði kallaður Horny. Þessi mismundi framburður á nafni besta knattspyrnumanns veraldar fer í taugarnar á mér. Getum við hér eftir sæst á að kalla hann bara Hinrik?

Að lokum sendi ég Helga Seljan, Kastljósmanni, kærar kveðjur, þar sem hann nagar blýanta í Skaptahlíðinni. Notalegt hjá Ara Edwald að halda honum uppá Stöð í hálfgerðu tilgangsleysi mánuðum saman, rétt eftir einn blóðugusta niðurskurð fjölmiðlasögunnar.

Piss 103

2006-10-30T22:48:00.000Z

Áður en þið lesið lengra vil ég vara ykkur við því að efni þessa pistils er ekki fyrir viðkvæma. Hann fjallar nefnilega um nútímalega list.

Ég hvet ykkur til að skoða þessa frétt sem Baldvin Þór Bergsson gerði. Hún er um nemendur sem gerðu vægast sagt óvenjulegt verkefni í Listaháskólanum. Þrír drengir í læknaslopp klipptu fyrst hárið af nakinni stúlku og verkefnið endaði með því að einn þeirra pissaði yfir stúlkuna.

Nú skal ég fúslega viðurkenna að ég er lítil listaspíra í mér. En úr því að þvaglát eru orðin sjálfsagður hluti námsefnisins í listaháskólanum get ég svosem játað að hafa átt nokkrar unaðsstundir með listagyðjunni inni á salerni. Hingað til hafa þær nú meira verið prívat og ekki hugsaðar sem djúpt innlegg í listasöguna. Í ljósi nýjustu frétta mun ég hinsvegar að sjálfsögðu reyna að fá þessar klósettferðir metnar til eininga í listaháskólanum. Mín akademíska hugsun á salerninu hefur reyndar aldrei ratað á það kúltúrstig að ég hafi klæðst læknaslopp eða migið á heimilisfólkið til menningarauka. En það er nú bara vegna þess að ég er úr Garðabænum og þekki ekki fínustu blæbrigði listarinnar.

Kommon!

Ég ekki hvort er sorglegra, þetta lið sem mígur á hvort annað í kennslustundum, eða skólastjórnendurnir sem þora ekki að koma opinberlega fram og benda fólki á að það sé enn við hæfi að hegða sér á siviliseraðan hátt. Við hvað eru menn hræddir? Að skilja ekki listina? Að vera úthrópaðir plebbar og menningaróvitar af því að þeir samþykkja ekki að nemendur spræni á hvern annan í tíma?

Og í guðanna bænum ekki misskilja mig. Úr því að nemendum listaháskólans er svona mikið mál, þá mega þeir mín vegna reyna það verklega á eigin skinni hvernig tilfinning það er að vera hlandskál eða bekken. En óneitanlega væri það skynsamlegra ef þeir eyddu frímínútunum í þessa vitleysu, því það er hollt í öllu skólastarfi að brúka kennslustundirnar í lærdóm. Þótt það sé kannski gamaldags.

Þetta minnir á listahátíðina fyrir nokkrum misserum sem sett var á Akureyri í beinni útsendingu sjónvarpsins. Þar mátti sjá ógurlega fansí listaverk á skjá þar sem maður skakaði pungnum á sér við drifskaft með lauk standandi útúr rassinum. Þessu metnaðarfulla verki var lýst svona í Mogganum: Greenman er blanda af manni og plöntu, hann er með lauka sem blómstra hægt og sígandi í munni og endaþarmi og lýsir myndbandið á mjög opinskáan hátt hvernig honum rís hold og síðan samræði hans við drifskaft skógvinnsluvélarinnar. Svo mörg voru þau orð.

Ég veit að ég er óttalega púkó en mér finnst gamla ævintýrið hans HC Andersen um nýju fötin keisarans alltaf vera besta listaverkið. Í ævintýrinu var það lítið barn sem benti á að keisarinn var ekki neinum fötum. Í nútímaútgáfunni dugir varla að benda á að keisarinn er ekki bara berrasaður. Því hann er líka hlandblautur og með lauk í rassgatinu!

sitt lítið...

2006-10-29T21:07:00.000Z

Orð dagsins á Þorsteinn Pálsson í leiðara fréttablaðsins í dag. Raðrökleysa. Mér finnst þetta orð verulega töff.

Reynir Traustason er öflugur maður og fær ritstjóri. En ég verð ekki beint vitstola af löngun í að lesa tímarit þegar ég sé hann ríðandi á hesti í miðbænum með trefil og hatt í sjónvarpsauglýsingu. Eða er tímaritið kannski nýr Eiðfaxi? Bíð spenntur eftir Ísafold. Af hverju auglýsir Styrmir aldrei moggann á línuskautum?

Sá í fréttum NFS uppúr Ísafold að Unnur Birna ætlar að kveðja sviðsljósið. Það gerir hún í forsíðuviðtali. Meikar sens!

Er Guð uppí hesthúsi?

2006-10-28T01:44:00.000Z

Hvað á maður eiginlega að segja um sóknarnefndarfarsann í Garðabænum? Þarna hefur allt logað í illdeilum einsog þjóðþekkt er og nú á sóknarnefndin að hafa verið hleruð með spæjaragræjum þar sem hún sat á áríðandi fundi. Uppí hesthúsi!!! Þegar maður veltir fyrir sér hasarnum hjá sóknarnefndinni dettur manni helst í hug að nefndin sé fyrirmynd Stöðumælavarðanna í Fóstbræðrum, sem virka þó full jarðbundnir í samanburðinum.

Annars er aktívitetið í þessu fólki, sem telur sig nær guði en við hin, ekkert ólíkindalegra en spássitúr jesú á vatninu eða brugghæfileikar hans. Og það er væntanlega ekki erfitt að sannfæra fólk sem heldur að örkin hans Nóa sé sönn saga, um að Ríkislögreglustjórinn hafi brennandi áhuga á innri málum sóknarnefndar Garðahrepps. Eða var það kannski leyniþjónusta Sjálfstæðisflokksins sem var að hlusta?

yfirlýsing - og fleira

2006-10-26T23:20:00.000Z

Ég lýsi því hér með yfir að ég styð Sigmar Guðmundsson í annað sætið í prófkjöri sjálfstæðisflokksins um helgina.

Vilhjálmur Þ Vilhjálmsson,
borgarstjóri

-----

Sirkus tekur viðtal við frægan poppdópista, Ívar Örn Kolbeinsson, sem talar hispurslaust um viðhorf sín til kvenfólks og kókaíns. Viðtalið er afhjúpandi og sláandi. Sirkusblaðið er gagnrýnt fyrir að upphefja neyslu Ívars. Því er mótmælt með þeim rökum að fjölmiðlar eigi að sýna veröldina einsog hún er, en ekki einsog hún ætti að vera. Og í Sirkus blasti dópistinn við í allri sinni eymd og engu var haldið frá lesandanum. Þetta eru góð og gild rök í blaðamennsku.

Síðan birta Kastljós og Mogginn viðtal við móður popparans þar sem hún gagnrýnir bæði neyslu sonarins og umfjöllun fjölmiðla um hann. Þar var engu í hennar óttablöndnu skoðunum á örlögum sonarins haldið frá áhorfendum. En þá ber svo einkennilega við að rökin um að sýna veröldina einsog hún er, virðast ekki lengur góð og gild. Ekki ef marka má leiðara og fjölmiðlapistli Fréttablaðsins í dag.
Lesandinn má bara sjá veröld fársjúks fíkniefnaneytanda sem ramblar áfram í firrtri veröld. Angist móður hans og gagnrýni er lesandanum ekki hollt að sjá vegna þess að hún beinist að hluta til að fjölmiðlum. Hún er á einhvern einkennilegan hátt óæskilegri en firring fíkniefnaneytandans.

Fjölmiðlar eiga að spegla samfélagið segir einn besti penni fréttablaðsins, Jón Kaldal. Og ég er því hjartanlega sammála. En að það sé bara pláss fyrir sjúkan fíkilinn en ekki örvæntingafulla móðurina í spegilmyndinni finnst mér hæpið. Og er vonandi ekki í anda Fréttablaðsins.

Í fjölmiðlapistlinum er Jakob Bjarnar fyndinn að vanda. Gagnrýni móðurinnar er framlenging á skoðun Kastljóss og Moggans sem líta á sig sem góða fjölmiðla og sjá hina sem vonda, segir Jakob. Skoðun viðmælandans er skoðun miðilsins, semsagt. Ef þetta er rétt hjá Jakobi, þá hljóta viðhorf Ívars til kvenna og kókaíns í téðu Sirkusviðtali að vera framlenging á skoðun Sirkuss. Eða gildir þetta bara um “góðu” miðlana?

Svo fer Jakob háðulegum orðum um þessa “góðu” fjölmiðla sem ætlist til að haft sé “vit fyrir viðmælendum og passað uppá lesendur og áhorfendur”. En samt er pistill hans skrifaður í einhverju fúllyndi yfir því að Kastljós og Mogginn höfðu ekki vit fyrir móður Ívars og báru þessa vitleysu úr henni á borð fyrir lesendur og áhorfendur. Þvílík hræsni.

Og það er kvartað undan því hér að ekki hafi verið nægjanlega mikil gagnrýni í viðtölum við móðurina, fremur einhver meðvirkni. En bíðum við. Fangar þetta orð, meðvirkni, ekki ágætlega stemmninguna í Sirkusviðtalinu? Þar var ástandi fíkilsins lýst af blaðamanni með orðunum: “Sjálfur er Ívar illa góður á því”. “Illa góður á því” er einkunn blaðamanns á unglingablaði á kengdópuðum poppara að þusa rúnk og dópsögur í diktafón. Er þetta ekki upphafning og meðvirkni?

Að mínu viti mátti alveg spyrja móðurina með gagnrýnni hætti um hvort hún sé ekki að varpa ábyrgðinni á hegðun og veikindum sonarins yfir á fjölmiðla. Það var full ástæða til þess. Blaðamaður Sirkus mátti einnig vera gagnrýnni á Ívar í viðtalinu í stað þess að segja hann illa góðan á því. En bæði viðtölin áttu fullkomlega rétt á sér. Pennar Fréttablaðs og Blaðsins ættu hinsvegar að leggjast undir feld og skoða vandlega hvort ekki sé ekki örugglega absúrd að gagnrýna aðra miðla fyrir að spegla samfélagið einsog það er.

Kurteisislegu hatursbréfin

2006-10-25T14:03:00.000Z

Það eru margar kurteisisvenjur sem ég skil ekki. Enda er ég almennt talin dónalegur drumbur. Ég hef til að mynda aldrei skilið af hverju bréfritarar enda bréf sín með orðinu “virðingarfyllst” þegar augljóst er að þeir bera ekki nokkra virðingu fyrir viðtakandanum. Dæmi um þetta er bréf Jóns Ásgeirs Jóhannessonar til Jóns HB Snorrasonar sem birt er hér. Nú ætla ég ekki að hætta mér í það fúla fen að tala um efnisatriði Baugsmálsins, en það dylst engum að litlir kærleikar eru þarna á milli. Samt enda bréfin á milli aðila alltaf á þessu jákvæða orði “virðingarfyllst” sem er yfirleitt í hrópandi mótsögn við efnið. Hvernig væri nú ef Baugsmenn og lögregla þróuðu áfram þennan einkennilega stíl sem er á bréfunum. Það yrði amk skemmtilegra lesefni fyrir almenning, sem vegna langvinnra leiðinda málsins er einnig orðin fórnarlamb. Þá væru kurteisislegu hatursbréfin einhvern veginn svona:

Kæri ofsækjari, Jón HB Snorrason.

Þér eruð bjáni. Embættisfærslur yðar eru ömurlegar og þér eruð hundur í bandi stjórnmálamanna. Ofsóknir yðar eru geðsjúklega hallærislegar og þér eruð blettur á réttarvörslu kerfi voru. Vér erum saklausir.

Virðingarfyllst,
Jón Ásgeir Jóhannesson

Saksóknari svarar:

Æruverðugi glæpon, Jón Ásgeir Jóhannesson

Þér eruð þjófur og skattsvikari. Ef vér náum yður ekki fyrir efnahagsbrot eða skattsvik, þá riggum vér upp stöðumælasektum til að koma yður bak við lás og slá, þarna vínberjaokrarinn yðar. Þér ættuð að skammast yðar. Davíð biður ekki að heilsa. Fífl.

Virðingarfyllst.
Jón HB Snorrason

FRAMBJÓÐANDINN

2006-10-21T22:27:00.000Z

Mikið er allt fólkið sem núna er í prófkjörum frambærilegt. Svo belgfullt af manngæsku og góðum hugmyndum að það er óhætt að loka þjóðarbúllunni nái það ekki kjöri. Ég er búin að stúdera stefnumálin og hugsjónirnar og hef hér smættað niður í öreindir hinn dæmigerða meðal vísitöluframbjóðanda sem tröllríður fjölmiðlunum um þessar mundir:

Hann vill efla menntun og heilbrigði þjóðarinar á nýrri öld. Þannig sker hann sig úr hópi annara frambjóðenda sem stefna að almennu ólæsi og vilja smita þjóðina af berklum og herpes og koma henni fyrir í moldarkofum.

Hann horfir til framtíðar og ætlar sér að stuðla að nýsköpun. Öfugt við hina lúðana sem vilja búa hér til samfélag steinaldarmanna sem ræktar ber og étur mammúta.

Hann vill efla forvarnir og stuðla að fjölskylduvænna samfélagi. Eins gott að taka þetta fram svo fólk haldi ekki að hann vilji selja krakk í skólum og gera kostnað við framhjáhald og heimilisofbeldi frádráttabæran frá skatti.

Hann leggur áherslu á heiðarleika og umhyggju fyrir samborgurum sínum. Hann ætlar semsagt ekki að drepa gæludýr lítilla barna og hnupla í matinn.

Hann vill nútímalega stjórnunarhætti og efla lýðræðið. Hinir frambjóðendurnir stefna nefnilega að konungsbundnu keisaradæmi þar sem kalífi stjórnar með aðstoð ættbálkaráðs.

Hann vill berjast fyrir efnahagslegum framförum og auka hagvöxt. Hver hefur örbirgð og fátækt á stefnuskránni?

Þessi frambjóðandi leggur gríðarlega áherslu á að allir hafi það alltaf rosalega gott. Og að engin þurfi að þjást neinsstaðar staðar. Allir eiga að fá allt sem þeir vilja, þegar þeir vilja það og án þess að borga krónu fyrir. Enda er ljótt að mismuna fólki.

Þessi vísitöluframbjóðandi býður sig fram í nafni réttlætis og hugsjóna. Flokkur hans er umbótasinnaður framfaraflokkur en ekki síður framfarasinnaður velferðarflokkur. Þá er vel hægt að kalla flokkinn frjálslyndan lýðræðisflokk sem stendur vörð um grundvallargildi samfélagsins og setur manninn og velferð hans í öndvegi. Þetta er til aðgreiningar frá afturhaldssinnuðu einræðisflokkunum sem vilja kúga almenning og pynta og setja velferð Glóbrystingsins í öndvegi.

Ástþór Magnússon má þó eiga það að hann hafði sérstöðu.

Fjöldamótmæli

2006-10-20T01:32:00.000Z

Ég veit það er stundum erfitt að fylla fréttatímana um helgar með djúsí stöffi, en ætli þessi frétt sé ekki einhverskonar met í tíðindaleysi. Fjórir, segi og skrifa fjórir einstaklingar, voru að mótmæla veru Bandarísks herskips í íslenskri höfn! Mótmælendurnir voru nákvæmlega jafn margir og þarf til að spila bridds. Og of fáir til að fylla einn Toyota Yaris. Mótmælendurnir voru svo fáir við herskipið að það eru fleiri við kvöldverðarborðið hér í Kórsölunum þegar öll börnin eru á svæðinu. Það munar einum. Hvað ætla fréttirnar að gera ef 5 manns mótmæla breyttum opnunartíma Fellahellis? Bein útsending kannski?

Blað og Orð

2006-10-18T11:18:00.000Z

Það er ekki skemmtilegt fyrir fjölmiðla, sem vilja vera frjálsir og óháðir, að sitja undir því að vera handbendi stjórnmálaafla eða auðjöfra. Í mörg ár hefur Mogginn reynt að lemja af sér öll tengsl við Sjálfstæðisflokkinn. Síðustu ár hefur Fréttablaðið þráfaldlega svarið það af sér að vera málgagn Baugs. Blaðið fer hinsvegar þveröfuga leið og opinberar með miklu stolti á forsíðu og baksíðu að það sé málpípa Birgis Ármannssonar.
Auðvitað er það rökrétt hjá Blaðinu að fara þessa leið. SME ritstjóri hefur gerbreytt útliti þess og efnistökum og segir sjálfur í leiðara að Blaðið eigi að vera "alþýðlegt og neytendavænt" og höfða til unga fólksins í auknum mæli. Og er til eitthvað alþýðlegra og neytendavænna stöff fyrir táningana en flennistór forsíðumynd af Bigga Ármanns að hakka í sig prófkjörsgraut með dóttur sinni?
Ekki misskilja mig. Biggi er eðalnáungi og Blaðið er toppmiðill. En auglýsingadeildin í hádegismóum hefur alltof mikil völd. Til að vera kvikindislegur má svo velta vöngum yfir því hvort það sé eftirsóknarvert fyrir Birgi að vera á forsíðu Blaðsins á sömu forsendum og Nóatúnslambahryggurinn sem kostar 999 krónur á tilboði...

Orðið er oft skemmtilegt þótt það eigi til að skúbba röngum fréttum. Í seinni tíð er orðið orðið orðlaust því færslan af Ellerti Schram frá því síðasta föstudag er sú nýjasta. Fyrir nú utan að það er engin sérstök frétt að Ellert íhugi framboð því hann hefur verið að því síðustu 30 árin. Ellert var meira að segja að íhuga framboð þegar kosið var til stjórnar húsfélagsins í Kórsölunum á dögunum, jafnvel þótt hann búi í Sörlaskjóli.

Spyrillinn

2006-10-17T10:33:00.000Z

Björn Bjarnason skrifar um viðtal sem ég átti við hann um hlerunarmálin í gær á vefsíðu sinni. Það sama gerir Guðmundur Magnússon á sinni bloggsíðu. Þeir falla báðir í þá gildru að álykta að spyrill í svona viðtali spyrji bara útfrá eigin skoðunum og viðhorfum, en ekki útfrá umræðu, fullyrðingum og andrúmslofti í samfélaginu. Báðir halda að Sigmar Guðmundsson hafi persónulega mikið vantraust á ríkissaksóknara og lögreglu í hlerunarmálinu og byggja það á spurningum mínum. Báðir hafa rangt fyrir sér. Sigmar Guðmundsson hefur enga sérstaka skoðun á ríkissaksóknara eða lögreglu í þessu máli. Spyrillinn Sigmar spurði hinsvegar útfrá þeirri gagnrýni sem þetta hefur fengið, til að mynda frá Árna Páli Árnasyni. Þá var ástæða til að spyrja þessara spurninga þar sem umræða um sjálfstæði stofnanna frá ráðherravaldinu dúkkar reglulega upp í samfélaginu. Með því að spyrja er ekki verið að slá einu né neinu föstu, heldur er spurningin leið til þess að fá fram skoðanir og svör við þessum fullyrðingum pólitískra andstæðinga. Það er svo áhorfandans að meta hvað er er rétt og hvað ekki. Þetta ættu Björn og Guðmundur að vita en báðir hafa gengt ábyrgðarstöðum á ritstjórnum. Auk þess verður að hafa í huga að engin pólitískur andstæðingur var í þættinum til að veita Birni viðnám en það kallar á hvassari tón frá spyrli. Annars er svona gagnrýni ekki ný af nálinni. Því er reglulega haldið fram að við spyrjum útfrá skoðunum okkar og drögum taum einhverra stjórnmálaafla. Sem betur fer kemur sú gagnrýni úr öllum flokkum og ekkert síður af vinstri væng en þeim hægri. Það finnst mér staðfesting á því að við séum sjálfstæð og gerum skyldu okkar gagnvart almenningi en ekki stjórmálamönnum.

Börn og blogg

2006-10-16T16:08:00.000Z

Það er ekki tekið út með sældinni að halda úti þessum bloggskrifum. Hér sést hversu gríðarlega mikið ég þarf stundum að hafa fyrir því að þrykkja í færslu. Og meðan ég man, veit einhver um gott tilboð á ófrjósemisaðgerð fyrir karla?

Enn meiri friður

2006-10-13T20:53:00.000Z

Nú hafa framsýnir og rétthugsandi menn í Reykjavík tekið stórt skref í átt til betra lífs á þessari jörð. Búið er að setja á laggirnar friðarstofnun Reykjavíkur sem á að fjalla um friðarmál á alþjóðlegum vettvangi, auk þess sem heitt verður á könnunni í Höfða fyrir deiluaðila um allan heim. Vonandi er nóg bakkelsi til því þarna verður vafalítið brjáluð traffík af Téttjenskum skæruliðum, Hamasliðum, Ísraelum, Tamíl tígrum, Hishbollum, Bandarískum öfgamönnum og Nasistum. Einhverjir kverúlantar og úrtölumenn munu vafalítið benda á að yfirvöld í borginni hafi ekki ennþá náð að stilla til friðar í miðbænum um helgar og því séu markmiðin um frið í gervöllu sólkerfinu soldið háleit. En ég fer að minnsta kosti pollrólegur í háttinn þegar þessi stofnun verður komin í aksjón og friðarsúlan hennar Yoko farin að loga. Ef svo Kórsalirnir verða gerðir að kjarnorkuvopnalausu svæði einsog að er stefnt hér í blokkinni þá er orðið svo friðvænlegt hér í hverfinu að maður þarf að fara yfir í Garðabæinn í leit að spennu.
.

Njósnir

2006-10-12T23:00:00.000Z

Allt þetta leyniþjónustu og hleranatal hefur gert mig alveg svakalega paranoid. Ég heyri fótatak fyrir utan gluggann minn á nóttunni og ég er ekki frá því að á öll mín símtöl sé hlustað. Þessar spæjaraaðfarir vekja ugg í mínu brjósti og ég er órólegur í hjartanu mínu þegar ég halla höfði á kodda að kveldi. Verst finnst mér þó að vera nakinn og berskjaldaður gagnvart þeirri hrollvekjandi tilfinningu að einhver sé að stelast til að lesa bloggið mitt.

Frasar

2006-10-11T01:11:00.000Z

Það er afar brýnt á kosningavetri að stjórnmálamenn leggist á eitt um að útrýma nokkrum útjöskuðum frösum svo pöpullinn missi ekki svefn og geðheilsu. Hér er yfirlit yfir nokkrar klisjur sem þingmenn nota ótt og títt en mættu gjarnan hverfa úr málinu.

1. “korteri fyrir kosningar”. Þessi lumma hefur verið ákaft notuð af stjórnarandstöðuþingmönnum útaf matarskattslækkunum. Ég legg til að frumlegir þingmenn noti fallegra mál og tali frekar um stundarfjórðung í þessu samhengi.

2. “Vika er langur tími í pólitík”. Þessi klisja er oft notuð. Svo oft að ég held að þingmenn trúi því sjálfir að þessi langa vika sé réttlæting og rökstuðningur fyrir fimm mánaða sumarfríi og tveggja mánaða jólafríi.

3. “að taka umræðu um eitthvað” Þetta er sá þingmannafrasi sem heyrist oftast. Gallinn er bara sá að það er bara einn þingmaður sem notar hann, Guðlaugur Þór Þórðarsson.

4. “Það á engin neitt í pólitík”. Jeræt. Segiði Alfreð Þorsteinssyni það. Hann átti fullt þegar hann var í pólitík.

5. “Við göngum óbundnir til kosninga”. Hvað með kosningaloforðin? Óbundnir af þeim?

Það er of seint að taka umræðu um eitthvað núna korteri fyrir kosningarnar sem við göngum óbundnir til enda er vika langur tími í pólitíkinni sem engin á neitt í...

Að lokum vil ég senda grásprengdum fullorðnum vini mínum batakveðjur vegna aðgerðarinnar sem hann er að fara í. Það er ekkert grín að fá nýjan mjaðmalið á sama tíma og blöðruhálskirtillinn er í skralli. Aldurinn.....

Friður á jörð

2006-10-09T23:26:00.000Z

Ég get ekki beðið eftir því að Yoko Ono kveiki á friðarsúlunni sinni. Ég er algerlega sannfærður um að þessi eilífðargeisli á Íslenskri eyðieyju verður til þess að fólk láti af öllu hatri í heiminum. Auðvitað fattar Bush að hann á ekkert að vera tuddast þetta í Guantanamo þegar Yoko stingur í samband. Ísraelar fá bullandi móral yfir því að vera pönkast í Palestínumönnum. Jón Ásgeir sendir Davíð fallegt SMS og Þórhallur Gunnarsson tekur mötuneytið í sátt. Allt verður svo rosalega fallegt og gott þegar ljósið kviknar í Viðey að meira að segja kettir hætta að veiða mýs. Það er reyndar ólíklegt að Kristinn H Gunnarsson verði sáttur við þetta brölt í frú Ono, en það er nú meira vegna þess að friðarsúlan er ekki staðsett á landsbyggðinni. Eini praktíski gallinn við þessa frábæru hugmynd er að það verður erfitt að slökkva þetta magnaða friðarljós þegar höfuðborgin verður myrkvuð á næstu kvikmyndahátíð. Þá færi nefnilega heimsfriðurinn fyrir lítið.

Unga fólkið og stjórnmálamennirnir

2006-10-08T23:22:00.000Z

Róbert Marshall debúteraði sem frambjóðandi í Silfrinu í dag. Hann verður vafalítið öðrum frambjóðendum skeinuhættur enda orðhákur og öflugur náungi. Hann fór þó pínulítið frammúr sér í þættinum þegar hann í fullri alvöru fagnaði ferskum straumum í Framsókn með því að kalla Bjarna Harðarson fulltrúa unga fólksins. Bjarni er vissulega með ferskari mönnum en hann er hinsvegar fæddur árið 1961! Bjarni er því á svipuðu reki og Þórhallur Gunnarsson og ég þekki það af persónulegri reynslu að það er lífeðlisfræðilega ómögulegt að nota hugtakið ungur yfir Þórhall. Þetta ólæsi Róberts á aldur fólks hefur þó þann kost að það eru sáralitlar líkur á að hann fari að bera brennivín í ólögráða ungmenni á kosningaskrifstofunni sinni...

Risastóra trúar og trúleysideilan

2006-10-07T20:55:00.000Z

Mér hefur fundist fullrólegt andrúmsloftið á þessu bloggi síðustu daga. Það hefur verið óvenju lítið um skítkast, tuð og kverúlanta í kommentakerfinu mínu og er það ekki gott. Ég hef lesið af athygli umræður um trú og trúleysi á síðu snilldarpennans Davíðs Þórs Jónssonar, en uppúr kommentakerfinu hans flóir tuðið, misskilningurinn og reiðin í slíku magni að unaðslegt er að lesa. Fátt gerir fólk vanstilltara en umræða um trúmál og því eru þessi skrif óborganlega skemmtileg. Afstaða mín í þessari margslungnu deilu er djúp, fordómalaus og óheyrilega vel ígrunduð. Hún rúmast í stuttri setningu og hljóðar svo: trúaðir eru bjánar og trúlausir líka! Kommentakefið er opið, gjöriði svo vel...

Hoho

2006-10-06T14:34:00.000Z

Ég hef haft mörg orð um þennan ljóta reiðhjólahjálm sem ég þarf að nota til að vera gjaldgengur í umferðinni. Fátt kúl við hann, svona útlitslega séð. Það sættast allir á að hjálmurinn er mikilvægt öryggistæki en auðvitað verður maður fyrir einelti með þessi ósköp á hausnum. En það er skrítið að fá yfir sig einhverjar pillur frá hestafólki, líkt og ég hef upplifið. Ég er nefnilega óskaplega hamingjusamur yfir því að vera ekki með hestadellu því hjálmarnir sem hestamenn nota eru viðbjóður. Buxurnar og stígvélin eru absúrd og svo jaðrar það við ónáttúru að þurfa nota písk við ástundun áhugamáls. Hestamennska er því eitt einkennilegasta sport sem til er, því í raun og veru er fólk að klæða sig einsog fífl til þess eins að lykta einsog tað þegar heim er komið!

Lazer Cyclone

2006-10-03T12:21:00.000Z

Maður lifandi hvað reiðhjólalúkkið hefur slegið í gegn á mínum góða vinnustað. Fólk snýr sér nánast úr hálslið þegar ég spranga framhjá með straumlínulaga Lazer Cyclone hjálminn á hausnum, ennisbandið og reiðhjólateygjuna. Ég fíla mig einsog poppstjörnu þegar glápið fer fram úr hófi, enda skín fölskvalaus aðdáun úr hverju auga. Nema úr glyrnum Þórhalls Gunnarssonar. Úr þeim skín öfund enda á hann ekki svona hátísku höfuðprýði. Öfundina felur hann reyndar undir skikkju fagmennskunnar því hann heldur því blákalt fram að hjálmurinn minn fíni dragi úr trúverðugleika mínum sem fréttamanns og þar með Kastljóssins. Ég er reyndar ósammála þar sem tignarlegra höfuðfat er vandfundið. Þessi harkalegu viðbrögð ritstjórans benda eindregið til þess að ég fái ekki að vera með hjálminn í útsendingu, sem er óskiljanlegt í ljósi þess að umsjónarmenn kastljóssins hafa sést í púkalegri múnderíngum, svona í einlægni sagt. En til að friða ritstjórann, og vernda eigin trúverðugleika, hef ég ákveðið að merkja hjálminn. Á honum mun standa “Ísland í dag”.

Reiðhjólamaðurinn

2006-10-01T21:23:00.000Z

Keypti mér hjól um helgina. Þrusugræja sem á að vera fararskjóti minn í vetur þegar ekki er hríðabylur og hraglandi. Vonandi að fleiri feti í mín fótspor og gefi skít í einkabílismann. Í fyrramálið verður jómfrúarferðin í vinnunna og ég vil því biðja ökumenn að sýna aðgæslu og tillitsemi þegar þeir sjá renglulegan reiðhjólamann á ferð með ljótasta hjálm sem fyrirfinnst í gervöllum geiminum. Svo mikil sjónmengun er af þessum hjálmi að ég held að það séu talsverðar líkur á að einhverjir ökumenn freistist til að keyra á mig af fagurfræðilegum ástæðum. Ég verð þó ekki hallærislegasti maðurinn í umferðinni á morgun ef Logi Bergmann asnast til að fara skeggjaður í vinnuna á þessu saumavélavélhjólavannabíi sem hann sýndi þjóðinni á síðum fréttablaðsins á dögunum. Annars má ég ekki vera að því að blogga mikið lengur því ég á eftir að flokka heimilissorpið og brjóta saman fjölnota innkaupapokann minn eftir velheppnaða búðarferð í Yggdrasill. Svo er aldrei að vita nema ég strauji mussuna mína og mótmæli heimsvæðingunni ef tími vinnst til. Pú á Bush.

Myrkur og smáauglýsing

2006-09-29T00:40:00.000Z

Þessi meinta myrkvun höfuðborgarsvæðisins var frómt frá sagt ekkert spes. Vissulega dró úr þessu illkynja fyrirbæri sem ójarðtengdir fagurkerar kalla “ljósmengun”, en venjulegt fólk kallar nauðsynlega götulýsingu. “Mengunin” var samt of mikil þar sem fólk var ekki nógu duglegt að slökkva heimilisljósin og því varð maður ekki fyrir neitt sérstökum hughrifum. Fín tilraun samt, en ég held að það væri líklegra til árangurs ef fólk greiddi ekki rafmagnsreikningana sína í einhvern tíma. Þá er algert garantí fyrir því að ljósin slökkna á endanum. Og fyrirgefiði, hvað var með alla bjánana sem ruku útí garð og sprengdu flugelda á meðan á myrkvuninni stóð? Skildi þetta lið ekki konseptið eða heldur það í alvöru að það sé gott að skoða stjörnur í gegnum brennandi púður? “Þarna er Karlsvagninn, austan við tívólíbombuna og gott ef glittir ekki í Pólstjörnuna í gegnum Gold Fan 150 skota risatertuna sem puðrast þarna útí loftið”.

Og svona rétt í lokin. Þóra er mjög skyndilega orðin heimilislaus og vantar íbúð til leigu strax. Hún er þrifaleg, en ekkert sérstaklega heiðarleg. GSM - 8634455

Hakk

2006-09-27T22:58:00.000Z

Simmi grenjar af öfund í færslunni hér að neðan og kvartar sáran undan tölvunni minni sem er gjörsamlega óaðfinnanleg.
Pc tölvan hans sökkar svo feitt að án nokkurrar fyrirhafnar gat ég hakkað mig inn á bloggsíðuna hans og sagt öllum hans dyggu lesendum að það er ekki sannleikskorn í nokkurri færslu sem fjallar um mig á þessu ágæta vefsetri. Ég tók mig líka til og lappaði aðeins uppá lúkkið.

Tölvan hans Simma er nokkurra vikna gömul en hefur þegar farið tvisvar á verkstæði.
Simmi sjálfur er hins vegar kominn á þann aldur að hann er hættur að geta tileinkað sér nýjungar. Þeir notuðu pc-tölvur til að spila Guns n Roses á X-inu í gamla daga og því er stórmál fyrir hann að skilja hvernig á að flakka á milli bloggsíðna í appletölvu þar sem leturgerðin er ekki sú sama og hann er vanur.

kossar, Þóra.

Heimiliserjur

2006-09-27T00:32:00.000Z

Það er velþekkt í samböndum að upp kemur ágreiningur sem virðist léttvægur í fyrstu, en hleður svo utan á sig þangað til allt er komið á heljarþröm. Hjá okkur Þóru hefur smám saman skapast ástand sem verður ekki liðið lengur. Nú verður konan að fara henda þessari Makkintosstölvudruslu sinni á haugana. Þetta er svo lélegt tæki að hún þarf alltaf að fá lánaða PC tölvuna mína í öll minni háttar rafræn viðvik. Fyrir vikið er ég tölvulaus löngum stundum því ekki get ég snert á þessu Makkaóbermi þar sem tækið liggur yfirleitt bilað eða frosið útí horni.

Þessi blindi átrúnaður fólks á Makkintoss er mér sífellt undrunarefni. Þrátt fyrir endalaus óþægindi er þessari meintu tölvu hampað sem einhverju tækniafreki hér á mínu heimili. Ég get alveg tekið undir með fólki að hún lúkkar vel og er flott hönnuð og rennileg. En það sama má segja um Pamelu Anderson og ekki dettur nokkrum heilvita manni að trúa henni fyrir heimabankanum, tölvupóstinum og vinnuskjölunum sínum. Makkintoss er fyrir sérvitringa, grafíska hönnuði og þá sem halda að þeir séu kúl en eru það ekki.

Og já, tölvuvírusar eru töff og heimilislegir.

Og nú fyllist kommentakerfið mitt af nördum sem í heilagri vandlætingu vilja halda uppi vörnum fyrir Makkann. Nafnlaust, að sjálfsögðu!

SVARTI LISTINN

2006-09-25T21:37:00.000Z

Síðustu daga hefur verið mikið rætt um öryggisþjónustu sem var víst starfrækt hér á íslandi um áratugaskeið. Þessi vísir að leyniþjónustu njósnaði bara um kommúnista og vilja margir fá öll smáatriði varðandi starfsemina fram í dagsljósið. Allt þetta tal um njósnir, gagnnjósnir, símhleranir, umsátur og annað leynistöff er góðra gjalda vert. En það er ekki síður brýnt hagsmunamál fyrir borgara þessa lands að allri leynd verði svipt af SVARTA LISTANUM ógurlega. Þessi listi er velþekktur í ýmsum kreðsum þjóðlífsins og ekki laust við að kalt vatn renni milli skinns og hörunds á fólki þegar það hvískrar sín á milli í skúmaskotum um þá sem lent hafa á þessum skuggalista. Enda hefur hann umturnað lífi svo margra. Engin veit með vissu hvernig þessi listi varð upphaflega til, en hitt er alkunna að sá sem hlýtur þau sársaukafullu örlög að fara á listann losnar aldrei af honum aftur. Aldrei. Hann er hulinn dulúðlegum leyndarhjúp og svo andstyggilega laus við allt sem kallast mannúð að helst má jafna við dauðalista KGB og SS sveita nasista. Ég er að sjálfsögðu að tala um SVARTA LISTA myndbandaleiganna. Þessi helvítis listi hefur gert það að verkum að Þóra fer aldrei útá leigu, bara ég. Stöðvum þetta óréttlæti, strax!

Arsenal - Grindavík

2006-09-23T22:57:00.000Z

Hverskonar rugl er það að banna útsendingar frá enska fótboltanum af því það er verið að spila lokaumferðina á íslandsmótinu? Halda menn virkilega að þeim fjölmörgu sem er slétt sama um íslenska boltann, en eru gallharðir aðdáendur þess enska, þyrpist á völlinn í nepjunni til að góna á Grindavík eða Breiðablik, af því að það er skrúfað fyrir Arsenal og Liverpool? Ætli æðstu strumpar KSÍ yrðu hressir ef þeim væri bannað að sjá Rolling Stones tónleika með þeim orðum að þeir gætu nú bara allt eins haskað sér á Savannatríóið í Fellahelli.
Með fullri virðingu fyrir leikmönnum ÍBV, þá eru þeir ekkert söbbstitjút fyrir Henrý og Gerrard. Þetta er sama forræðishyggjusteypan og sjónvarpslaus fimmtudagskvöld og maður veltir því fyrir sér hvort bráðlega komi ekki fram krafa um að kvikmyndahúsum og sundlaugum verði lokað í því skyni að flæma fólk á völlinn. KSÍ er ekki að auka virðingu fólks fyrir íslenskum fótbolta með svona vanhugsuðum þvingunaraðgerðum.

Sitt lítið...

2006-09-22T13:34:00.000Z

Í morgun var mikið að gera hjá mér. Ég var fundarstjóri á fjölmennu málþingi, átti tvo vinnufundi útí bæ og að auki samskipti við fjölmarga vinnufélaga. Það var því svolítið óþægilegt að fatta strax eftir hádegið að ef þessu fólki átti að finnast ég töff og smart, þá þyrfti hárvöxtur úr nefi og eyrum að vera í tísku!

Hvaða asni var það sem fann upp kvefið? Drepum hann.

Róberti Marshall vini mínum sendi ég góðar kveðjur. Hann rís fljótt upp aftur þótt hann hafi verið drekinn frá NFS. Róbert er toppnáungi, mikill húmoristi og góður vinur, en hefur þann leiða galla að skrifa of mikið af bréfum.

Kæri Páll..... Part 2.

2006-09-20T19:07:00.000Z

Þú verður að fyrirgefa mér þessi sífelldu bréfaskrif til þín, kæri Páll. Erindið er hinsvegar brýnt og varðar starfsumhverfi okkar í Kastljósinu. Í mestu vinsemd spyr ég þig; hvaða ídíót ákvað að blanda saman uppöldum Rúvurum, “aðkeyptu fólki” og “gullmolum” í þessum þætti? Hvaða hálviti er svo skyni skroppinn að halda að eitthvað kreatíft geti komið útúr slíkum hrærigraut? Nú er ég ekki fordómafullur maður en það vita allir að “aðkeypt fólk” á enga samleið með hinum hreina kynstofni Rúvara einsog félag fréttamanna hefur nú þegar bent á. Þessar misráðnu kynbætur, sem ég vil leyfa mér að kalla svo, eru gjörsamlega mislukkaðar og til þess fallnar að ala á sundrungu, fordómum, einelti og almennum fjandskap. Þá hefur þetta skapað ómæld vandræði í mötuneytinu því ekki borðar þetta lið sama matinn. En svo að þetta bréfkorn hafi ekki bara yfirbragð tuðs, vil ég að lokum koma með tillögur til úrbóta. Ég tel brýnt að “gullmolunum” og “aðkeypta fólkinu” verði gert kleyft að laga sig betur að hinum sanna Rúv anda með því sækja námskeið þar sem farið verður yfir helstu undirstöðuatriði. Björg Eva Erlendsdóttir, fréttamaður, yrði prýðilegur leiðbeinandi á þessu námskeiði, enda hefur hún umtalsverða reynslu af því að kalla eftir samstöðu í stéttinni með því að kasta hnútum í samstarfsmenn. Að lokum er hér listi, kæri Páll, yfir það fólk sem hefði gott af því að sækja þetta námskeið. Listinn er ekki tæmandi.

Þórhallur Gunnarsson
Ingólfur Bjarni Sigfússon
Elín Hirst
Jóhanna Vilhjálmsdóttir
Helgi Seljan
Katrín Pálsdóttir
Eva María Jónsdóttir
Páll Magnússon
Jóhanna Vigdís Hjaltadóttir
Geir Magnússon
Þóra Tómasdóttir
Guðfinnur Sigurvinsson
Sigmar Guðmundsson
Gísli Einarsson

Ég tel það vænlegast til árangurs að leiðbeinandinn fari hægt og rólega yfir námsefnið því þetta fólk hefur starfað á öðrum fjölmiðlum og reiðir því hvorki vit né athyglisgáfur í þverpokum.

Þinn pennavinur,

Sigmar Guðmundsson

Kæri Páll...

2006-09-18T23:00:00.000Z

Eins og fram hefur komið í fjölmiðlum vinn ég bara 12 daga í mánuði á fullum launum eins og aðrir á Ruv. Var bara að spegúlera hvort ekki væri í lagi þín vegna ef ég ynni fyrstu 12 dagana í mánuðinum og væri svo í fríi næstu 18 dagana. Núverandi fyrirkomulag gerir það nefnilega að verkum að vinnan slítur svo helvíti mikið í sundur fyrir mér fríið. Ekki er laust við að ég hafi heyrt fleiri starfsmenn Ruv taka í sama streng. Svo væri ekki úr vegi, kæri Páll, að bæta tómstundaaðstöðuna á kaffistofunni þar sem starfmenn þínir sitja löngum stundum á meðan fréttamenn annara sjónvarpstöðva styrkja grunnstoðir lýðræðisins. Kæri Páll, þú ræður þessu á endanum. Það vita allir. Taktu slaginn með okkur.

kveðja,

Sigmar Guðmundsson

Frábær helgi

2006-09-18T01:12:00.000Z

Átti tvær tryllingslega góðar stundir um helgina og var í báðum tilfellum njótandi þess besta sem innihaldsrík afþreying hefur uppá að bjóða. Í raun má kalla þessa viðburði tveggja tíma risastóra raðfullnægingu þótt það sé vissulega vafasamt af streitara einsog mér að nota þá líkingu í ljósi þess að það voru eintómir karlmenn sem vöktu með mér þennan unaðshroll. En skítt með það. Að sjálfsögðu er ég að tala um tónleika Nick Cave og sigur Arsenal á Manchester United. Það er til marks um fegurð lífsins og sanngirni æðri máttarvalda að á einni helgi varð ég vitni að mörgum atvikum sem heilinn minn hefur nú þegar vistað í favorites:

1. lappalengsti leikmaður í heimi skorar gegn júnæted á 86 mínútu og tryggir þannig Arsenal sigur. Við Sindri dönsuðum lengi um íbúðina með slíkum hávaðaöskrum að Þóra, Katla og Salka fóru allar að grenja. Schniillld...

2. Nick Cave og Warren Ellis fara á kostum undir lok venjulegs leiktíma. Henry Lee, The Mercy Seat, Hiding All Away, God Is In The House og Tupelo voru síðustu lög fyrir uppklapp...og maður lifandi, þvílíkur performanns.

3. Jens Lehmann ver boltann með því að teygja líkamann og fetta út fingurna einsog Barbapabbi þegar norski súbersöbbinn gerði sig líklegan í blálokinn. Ein besta markvarsla sem ég hef séð. Ef Lehmann léki með öðru liði en Arsenal þá myndi ég hata hann meira en mígrenið mitt.

4. Nick Cave rennir sér í Stagger Lee í melankólískri útgáfu með slíkum kraftendi að líkja má við hnefahögg í smettið. Tár féllu í stúkunni, ekki af sársauka heldur gleði.

5. Ekkert upphitunarband fyrir Nick Cave. Ekkert uppgerðar kurteisisklapp. Þvílíkur unaður, því upphitunarbönd eru almennt ofmetin og til leiðinda. Nema Queens of the stoneage náttúrulega...

6. Gilberto klúðrar víti með því að renna í forinni einsog einhver Beckhamlúði. Það var reyndar ekkert sérstakt á meðan á því stóð en hreint unaðslegt eftirá að hafa klúðrað víti gegn júnæted en unnið samt. Múahhhahhaaaa.

Einnig fór ég í Kolaportið um helgina. Þangað fer ég aldrei aftur edrú.

Vek athygli á því að ég er búin að uppdeita linkana einsog sjá má hægra megin á síðunni. Rétt er að halda því til haga að vel hefði mátt nota orðin “uppfæra hlekkina” í setningunni hér á undan. Þar er bara ekki næstum því jafn kúl.

Plebbi

2006-09-15T23:19:00.000Z

Í matarboði í gærkvöldi þurfti ég að sæta stöðugum árásum frá óvönduðu fólki sem vill meina að ég sé úthverfaplebbi. Ojæja. Ég bjó svosem lengi í Garðabænum og er núna í Kórsölum í Kópavogi, þannig að ég er ekki alveg ókunnugur úthverfunum. Fullyrt var í matarboðinu að heimili mitt væri slíkur útnári að lítill munur væri á Kórsölum og Uppsölum – Simmi í Kórsölum og Gísli á Uppsölum væru í raun býsna líkir. Hahahahahahah. Allt var þetta óheyrilega fyndið og mér fannst gaman að sitja undir flissinu enda hafði ég sterkt á tilfinningunni að ég sæti til borðs með upperklassliði frá París, Róm eða Manhattan og allir sem þekkja mig vita hvað ég er veikur fyrir fínu fólki. En það rann upp fyrir mér ljós þegar ég sá ullarlagðinn og lopann lafa úr rassinum á sessunautum mínum sem önguðu af súrheyslykt og komu með ábrysti í mjólkurbrúsa í partíið í stað rauðvíns. Þetta lið sem sat til borðs hefur mestanpart alið manninn á Akureyri, Borgarnesi, Grundarfirði, Vestmannaeyjum og Ármúlanum og hefur tæpast efni á að kalla þá plebba sem búa í Kórsölunum. Ég gengst reyndar glaður við því að vera vaðandi plebbi en það hefur ekkert með búsetu að gera. Er frekar lífstíll.

Jæja gott fólk. Nick Cave annað kvöld í höllinni. Ég er nánast með steinsmugu af spenningi. Cave er listamaður sem hefur verið í miklu uppáhaldi hjá mér í 15 ár. Engin semur fallegri lög en hann og ef hann verður í sama formi og á Broadway fyrir fjórum árum þá verða þetta tónleikar ársins. Vonandi verður strompreykjandi pínulitla gamalmennið á bassanum einsog síðast.

YouTube

2006-09-13T00:09:00.000Z

Youtube.com er svalasta síðan innan í gervöllu internetinu sem Al Gore var svo vinsamlegur að finna upp. Það er hægt að týnast þarna tímunum saman. Síðustu nótt hékk ég yfir síðunni til hálf fjögur. Var ég að horfa á eitthvað uppbyggilegt? Hell, nei. Tónleikaupptökur, grínsketsar og alskyns froða er fyrirferðamest en einnig getur vefurinn verið stórfróðlegur og gagnlegur. Hér eru nokkur gullkorn:

Þessi djókari nær rödd Brian Johnson úr ACDC fáránlega vel. Hreyfingar Angus Young gítarleikar getur hann líka kóperað listilega.

Þessi skets frá Monty Python er klassík. John Cleese er fyndnastur.

Raddirnar úr simpson þáttunum. Snilld.

Myndir frá Lanzaranum...

2006-09-12T01:15:00.000Z

Dvölin á Lanzarote var snilld. Í tvær vikur dormuðum við og lékum okkur á sundlaugarbakka á hinu mjög svo barnvæna hóteli Prinsessa Yaisa. Við hirtum hvorki um GSM síma né internet og fylgdumst varla með fréttum að heiman. Ótrúlega ljúft að kúpla sig svona algerlega út og þessa stundina líður mér einsog fullhlaðinni Mótóróla BA256 rafhlöðu. Fyrsta myndin ber vinnuheitið “Fjölskyldan með fávitabrosið”og sýnir hún fólk sem í sælli fávisku hefur meiri áhyggjur af skorti á snakki og sólarvörn en þrasi um leynilegar Kárahnjúkaskýrslur.

Við Salka vorum dugleg í sundinu. Fyrri vikuna var svamlað í grunnu barnalauginni en síðan var stóra laugin tekin með trompi. Þessi aðlögun var meira fyrir mig en barnið, því ég er ámóta lipur í sundinu og steypustyrktarjárn.

Salka fór á kostum alla ferðina og skemmti sér best af öllum. Það kom fyrir að ég þurfti að leggja henni lífsreglurnar af föðurlegri hlýju og á slíkum stundum nærði ég sál hennar varfærnislega með þeirri visku sem fullorðna fólkið býr yfir. Á myndinni hér fyrir neðan er ég að útskýra fyrir Sölku gildi þess að næra sig vel á fyrirfram greiddu morgunverðarhlaðborði. Salka lét sér fátt um finnast en til allrar guðslukku borðaði Þóra á við 400 kílóa súmóglímukall í kappáti.

Það var líka farið á hestbak. Hér fyrir neðan sést Salka á spænsku útgáfunni af Orra frá Þúfu en einsog sjá má hefur þetta hross óvart verið sett í þurrkarann. Takið eftir fallegum og stæltum fótaburði sem þarna blasir við. Synd hvað lappirnar á hrossinu er ljótar í samanburðinum.

Katla var ótrúlega góð í hitanum og tók virkan þátt í sundferðunum á milli þess sem hún svaf....ja, einsog lítið barn.

Salka fann til mikillar ábyrgðar gagnvart kötlu og sá sig knúna til að gefa henni vatn að drekka með reglulegu millibili – Einkum og sérílagi þegar Katla svaf!

9/11

2006-09-11T00:19:00.000Z

Rosalega var heimildarmyndin góð sem sýnd var í sjónvarpinu í gær um manninn sem féll/stökk/hrapaði úr world trade center ellefta september og ljósmyndina sem náðist af atvikinu. Merkilegt að sjá viðtöl við fólk sem gat ekki hugsað þá hugsun til enda að ættingi þeirra hafi mögulega stokkið úr turninum þennan örlagaríka dag. Það hefði nefnilega verið sjálfsmorð og andstætt trú þeirra! Nú hefur maður að sjálfsögðu mikla samúð með fólki sem missir ættingja svo sviplega, en er ekki algerlega útí bláin að tala um sjálfsmorð þegar fólk stekkur úr turni undan kæfandi reyk og brennandi hita? Sá sem stekkur útúr svona víti undan logum og reyk hefur ekkert val um líf eða dauða, bara val um mismunandi dauðdaga. Allt tal um sjálfsmorð við þessar aðstæður og tilheyrandi vist í helvíti er því langsótt finnst mér.

Einnig fannst mér merkileg sú harða gagnrýni sem fjölmiðlarnir fengu sem birtu þessa mynd af hrapandi manninum. Fyrirfram myndi maður kannski halda að á degi þar sem flugvélar sjást fljúga inní turna sem síðan hrynja til grunna og þúsundir deyja, þætti mynd af einum og nánast óþekkjanlegum manni að hrapa ekki of grótesk. En það eru einmitt svona vafaatriði sem gera fréttamennskuna oft flókna. Hvað á að birta og hvenær? Klárlega ekki allt, alltaf.

Svo hvet ég áhugafólk um góðar sannsögulegar myndir að sjá United 93. Hrikalega góð ræma.

Einhverjir misingar kvarta í kommentakerfinu mínu yfir því að síðasta færsla hafi fjallað um fótbolta en ekki eitthvað annað. Þar fer Eyrún vinkona mín fremst í flokki og er reyndar með þá greindarlegu athugasemd að færslan, sem skrifuð var á laugardag, hefði frekar átt að fjalla um partíið sem við vorum í þá um kvöldið!!!!! Nú er ég engin sérstakur snillingur í að sjá inní framtíðina einsog hún virðist halda, en ég get fullvissað Eyrúnu um að ef ég byggi yfir slíkum hæfileika þá myndi ég ekki spandera honum í eitthvað bloggrugl heldur miklu fremur kaup á lottómiðum.

Vondur dagur

2006-09-09T16:56:00.000Z

Mikið er þetta leiðinlegur dagur. Arsenal að merja enn eitt jafnteflið á heimavelli gegn einhverju skítaliði og ekki hægt að segja annað en að byrjun tímabilsins sé ömurleg. Á sama tíma má lesa yfirlýsingu frá Ashley Cole þar sem hann segist fyrirgefa Arsenal!!! Þótt Cole sé frábær leikmaður er ég dauðfeginn því að hann sé farinn því það er erfitt að vera með mann í liðinu sem á í ólöglegum samningaviðræðum við helsta andstæðinginn. En að hann fyrirgefi Arsenal er ámóta heimskulegur viðsnúningur á hlutverkum og ef nauðgari segðist fyrirgefa fórnarlambi sínu fyrir að vilja ekki þýðast sig. Bjáni.

Annars er bara fínt að vera komin úr bloggfríi!

Zyggi á Lanzarann!

2006-08-22T02:11:00.000Z

Vegna strandakætis er óvíst hvort Zyggi nenni að skrifa mikið inná þessa síðu á næstunni. Við Þóra verðum með Sölku og Kötlu á Lanzarote næstu tvær vikurnar og ég sé það fyrir mér að ég verði of upptekin við sólbruna, leti og almennt óhóf til nenna að þrykkja í færslu. Og þó, kannski að maður dúndri í eina eða jafnvel tvær ef vel stendur á. Tekið skal fram að ég er prúður piltur og það er ekki inní myndinni að ég liggi berbrjósta í sólbaði.

Veðjað á hross

2006-08-20T22:52:00.000Z

Eftirfarandi símtal átti sér stað á dögunum á milli mín og StígamótaRúnu sem er tengdamóðir mín.

Simmi : Já halló.

StígamótaRúna : Sæll vertu Simmi.

Simmi : Nei sæl vertu og indælt að heyra í þér nú sem endranær. Ég var einmitt að hafa orð á því við hana Þóru dóttur þína hvað þú leist ljómandi huggulega út síðast þegar við hittumst. Hvað get ég nú gert fyrir þig á þessum fagra degi?

StígamótaRúna : Heyrðu ég var að spá... Ég er að elda svo mikið lamb, tandorí, þú veist. Viljið þið ekki bara koma í mat.

Simmi: Þetta er nú höfðinglega boðið StígamótaRúna mín, ekki síst í ljósi þess að ilmurinn í þínu eldhúsi er svo lokkandi. Við hinsvegar erum sjálf með kjúkling í ofninum sem er langt komin. Það væri kannski bara heppilegra ef við gætum fengið að eiga þetta inni hjá ykkur, StígamótaRúna mín, þótt það sé óneitanlega sárt að fá ekki að bragða þá himnesku sælu sem tandorílambið þitt er.

StígamótaRúna : Okei, ekkert mál, ég hringi þá bara í Hrossið.

Click (svona hljóð sem heyrist þegar símtali er slitið)

Hrossið sem um er rætt er Kristín Tómasdóttir, yngsta dóttir StígamótaRúnu. Í framhaldi af þessu hef ég velt því soldið fyrir mér hvaða viðurnefnum hún klínir á nýja tengdasyni, úr því hún kallar dóttur sína hófdýr?

Meira af Hrossinu. Kristín var einsog frægt er orðið númer 407 af 525 hlaupurum í sínum flokki í maraþoninu. Hún og elsta spandexsystirin, Sóley Tómasdóttir, voru í mikilli innbyrðiskeppni í maraþoninu, svo heiftúðugri að kærastar þeirra veðjuðu uppá plasmasjónvarp hvor systirin yrði á undan í mark. Hrossið vann og nú kallar kærastinn hennar hana veðhlaupahrossið.

Eðlilegasta fólk, fólkið hennar Þóru!!!!!

Þóra og Sindri

2006-08-20T01:46:00.000Z

Fyrir nákvæmlega fimm mánuðum lá Þóra á fæðingardeildinni og eignaðist Kötlu. Hún fór í fyrsta göngutúrinn eftir fæðinguna þann fyrsta mai . Í dag hljóp hún 10 kílómetrana í Reykjavíkurmaraþoninu á rúmum 55 mínútum. Frábær tími, líka fyrir þá sem eru ekki með fimm mánaða barn á brjósti. Þóra er nagli og töffari og ef það rignir ekki hrósinu yfir hana í kommentakerfinu hér að neðan þá tattúvera ég lógó hagstofunnar á ennið á ykkur. Það lítur svona út:Sindri minn er 10 ára og hefur aldrei áður tekið þátt í langhlaupi. Hann kláraði 10 kílómetrana á rúmum 53 mínútum, þrátt fyrir að hafa fengið blöðrur á fæturna snemma í hlaupinu og stoppað einu sinni til að gá eftir vini sínum. Þeir sem hafa fengið blöðrur snemma í 10 kílómetrahlaupi vita að það er auðvelt að fara að grenja af eymslum og labba í mark. En Sindri minn er nagli og töffari og hljóp áfram. Ef það rignir ekki hrósinu yfir hann í kommentakerfinu hér að neðan þá rispa ég bílana ykkar með naglaþjöl.

Sindri var sá þriðji í sínum árgangi og þessi frammúrskarandi árangur hans fær mig til að trúa að maraþonseta fyrir framan Playstation og Game boy leikjatölvur sé ljómandi góður undirbúningur fyrir svona hlaup. Hef samið æfingaplan fyrir sjálfan mig með hliðsjón af þessari uppgötvun og er reyndar þegar byrjaður að æfa af ákefð. Þess má svo geta að Benni, vinur Sindra, var fyrstur af 10 ára drengjunum í hlaupinu og fór 10 kílómetrana á undir 50 mínútum.

Almar bróðir minn, Glitnisstarfsmaður, fór einnig 10 kílómetrana. Þegar arfaslakur tími hans er skoðaður og metnaðarleysi hans í hlaupinu krufið, kemst maður ekki hjá því að velta því fyrir sér af hverju hann fór þetta ekki bara á bílnum! Yfirmaður Almars náði hinsvegar prýðilegum árangri í hlaupinu, þrátt fyrir að vera fyrst og fremst þekktur fyrir feminíska handverksiðn.

Sjálfur er ég meiddur á mjöðm og hef ekkert getað hlaupið síðari part sumars. Við Katla fórum bara í góðan göngutúr á meðan fólkið okkar hljóp, sendum því góða strauma og veittum móralskan og háværan stuðning síðustu metrana. Þess má geta að Katla er rígmontin af mömmu sinni. Hér sjást Sindri og Þóra fagna afrekinu í Reykjavíkurmaraþoninu.

Sindri að koma í mark.

Chippendales....og ég.

2006-08-18T01:51:00.000Z

Í dag öfunda ég íslenskar konur. Hér á landi er nefnilega staddur Chippendalesflokkurinn víðfrægi og ef marka má ummæli fulltrúa hópsins í Kastljósinu vinna þeir gríðarlega fórnfúst og hugsjónaríkt starf í þágu kvenna um víða veröld. Ég beinlínis táraðist þegar ég heyrði þá ítrekað lýsa drenglyndi sínu á þann veg að þeir “þjóni konum um allan heim af þeirri virðingu sem þær eiga skilið” – berir að ofan og með slaufu!

Viðtalið vakti mig líka til umhugsunar um samskipti mín við hitt kynið. Alkunna er að mig hefur alltaf skort þann internasjónal sjarma og rómans sem þarf til að heilla konur og “þjóna þeim af þeirri virðingu sem þær eiga skilið”. Enda er ég sveitamaður úr Garðabænum. Getur verið að augu kvenna opnist fyrir því hversu mikill happapungur og foli ég er, þegar ég fer að skaka mér einsog órangúti í leðurbuxum? Og að kynjöfurinn í mér komi í ljós þegar ég fer að ástunda alla þá greindarlegu og fáguðu framkomu sem einkennir þessa kjarneðlisfræðinga í Chippendaleshópnum? Getur einhver lánað mér svarta slaufu fyrir menningarnótt?

Bréf

2006-08-17T13:54:00.000Z

Þar sem svo mikil vinna hefur verið lögð í þetta bréf sem birtist í kommentunum við síðustu færslu minni, finnst mér tilvalið að gera því hærra undir höfði og birta það hér. Hef ekki hugmynd um hver skrifaði, en sá fær prik fyrir að nenna að lúslesa biblíuna til að benda á þversagnir í málflutningi þeirra sem fordæma samkynhneigð með tilvísun í guðsorð. Öll bókstafstrú er nefnilega ákaflega varasöm þar sem hún rænir fólki heilbrigðri skynsemi.

Opið bréf til Gunnars í Krossinum, Jón Vals Jenssonar, Snorra í Betel sem og
annarra bókstafstrúarmanna sem hafa “Sannleikann” sín megin og birtu m.a.
auglýsingu í Morgunblaðinu sl.Sunnudag varðandi “lækningu” við samkynhneigð:

Kæru bókstafstrúarmenn,
Kærar þakkir fyrir upplýsa fáfróðan almenning á Íslandi varðandi “Guðs lög” sem
og um “sannleikann”. Það er ljóst að það er mjög margt sem maður getur lært
frá ykkur – vitrari mönnum – og við reynum t.d. að miðla ykkar fróðleik eins
víða og við getum þar sem við teljum ykkur vera eins og þið segið – boðberar
sannleikans í einu og öllu.
Það eru hinsvegar nokkur atriði sem við þurfum aðstoð við varðandi “Guðs orð”
því eins og þið bentið alltaf á, er sannleikann að finna í guðs orði og orð
Guðs er óbreytanlegt og eilíft.
Eftir að hafa lesið Guðs orð undanfarið vakna nokkrar spurningar varðandi
óbreytanleika guðs orðs sem og þeirrar fullyrðingar að guðs orð sé eilíft og
hinn eini sannleikur:

1. Mig langar að selja dóttur mína í þrældóm eins og leyft er í guðs orði,
Exodus 21:7 – hvað teljið þið eðlilegt markaðsverð fyrir hana þar sem þið eruð
jú sérfræðingarnir hérna, er 18 ára og gullfalleg.
2. Ég veit að ég má ekki hafa neitt samband af neinu tagi við konu á meðan hún
er ´”túr” sbr. guðs orð Lev 15:19-24....hvernig fer ég að því að hafa ekkert
samband að neinu tagi við konu mína svo dögum skiptir ? Ber mér að flytja út úr
húsinu okkar ?
3. Í guðs orði, Lev 25:44 segir skýrt að ég megi hafa þræla – bæði karlmenn
sem og konur, svo framarlega sem þeir eru keyptir frá nágrannalöndum okkar.
Vandamálið er að ég er mjög hrifinn af Þjóðverjum og því langar mig að spyrja
af hverju ég megi ekki eiga þræla frá Þýskalandi þótt það sé ekki nágrannaland
okkar ?
4. Ég á vin sem krefst þess að vinna á “Sabbath” deginum. Í Guðs orði, Exodus
35:2 segir skýrt að hann skuli tekinn af lífi fyrir slíkan óhæfuverknað. Er ég
skyldugur til að drepa hann sjálfur eða get ég látið öðrum það eftir ?
5. Í guðs orði, Lev 21:20 segir skýrt að ég megi ekki nálgast altari guðs ef ég
hafi sjónskekkju , þ.e. ekki fullkomna sýn. Ég verð að viðurkenna að ég nota
lesgleraugu – er ekki eitthvad svigrúm hérna svo ég geti nálgast altari guðs ?
6. Flestir karlkyns vinir mínir fara í klippingu og snyrta nefhár osvfrv.,þrátt
fyrir að þetta sé stranglega bannað skv.guðs orði, Lev 19:27. Á hvaða hátt
ber að taka þessa menn af lífi ? Kitlar mig soldið að keyra yfir þá á nýja
jeppanum mínum ?
7. Frændi minn er bóndi. Því miður brýtur hann guðs orð, Lev 19:19 þar sem hann
er með 2 uppskerur á sömu jörð. Kona hans brýtur einnig sama ákvæði Guðs orðs
með því að nota 2 mismunandi efni í fötin sín (Cotton/Polyester). Hann blótar
einnig og rífur kjaft. Er það virkilega nauðsynlegt að safna öllum bæjarbúum
til að grýta þau til dauða eins og segir í guðs orði (Lev 24:10-16) ? Er ekki
bara hægt að brenna þau til dauða innan fjölskyldunnar, eins og við gerum með
fólk sem sefur hjá ættingjum sínum ?

Ég veit að þið hafið skoðað og lært þessar kenningar í einu og öllu svo ég er
sannfærður að þið getið hjálpað. Og síðast en ekki síst – bestu þakkir fyrir
að benda okkur á að Guðs orðs er ÓBREYTANLEGT og EILÍFT.
Bestu kveður,
Hinir fáfróðu

Þegar stórt er spurt...

2006-08-14T22:32:00.000Z

Ég las vandlega yfir auglýsinguna í mogganum um helgina þar sem því er haldið fram að hægt sé að "lækna" homma og lesbíur af samkynhneigð! Þessi auglýsing vakti mig heldur betur til umhugsunar um mátt læknavísindanna og nú velti ég því mikið fyrir mér hvort hægt sé að lækna fólk af heimsku.

Tiktúrur

2006-08-14T16:37:00.000Z

Ég hef alveg óskaplega gaman af sérvisku. Órökrétt skringilegheit hjá annars skynsömu fólki er krydd í tilveruna. Sérviskan í Þóru er stundum yfirgengilega skemmtileg. Sérstaklega þær tiktúrur að geta ekki sofið á nóttinni nema allar skápahurðir í svefnherberginu séu örugglega lokaðar. Rétt fyrir beðmál stormar hún einsog öryggisfasisti um svefnherbergið og lokar skápunum af vélrænni samviskusemi. Hún fellur oft í trans við þetta ritúal sitt en hirðir ekki neitt um útidyrnar, opna glugga eða svaladyr. Oft hef ég spurt hversvegna? Heldur hún að ljót skrýmsli eigi náttstað innan um nærbuxurnar okkar? Eða bíða kannski vitstola nauðgarar færis með sveðju í sokkaskúffunni? Um tíma hélt ég að fataskápurinn minn mætti ekki vera opin af fagurfræðilegum ástæðum þar sem ég þyki eiga eitt metnaðarfyllsta safn af ljótum fötum sem fyrirfinnst í álfunni. Í þeim efnum skáka ég jafnvel Bödda hárgreiðslumanni, jafnvel þótt mín föt séu ögn látlausari! En svo fattaði ég að skápurinn hennar Þóru má heldur ekki vera opin þannig að ráðgátan er enn óleyst. Eina svarið sem hún hefur gefið mér á þessu einkennilega háttalagi, er að hún óttist í það minnsta ekki að ljóti kallinn feli sig í skápunum. Sá ljóti komi sér nefnilega alltaf notalega fyrir á nóttinni í rúminu við hliðina á sér.

Útúr skápnum...

2006-08-11T23:31:00.000Z

Ég er ekki að ljóstra upp neinum stórasannleik þegar ég játa það á mig að vera óttaleg lumma. Hálfgerður lúði, satt best að segja. Samt hef alla tíð þráð að tolla í tískunni og vera svalur. Töff. Ég hef flett tískublöðum af áfergju og stúderað trendsettera í bak og fyrir. En þrátt fyrir mikla fyrirhöfn og einbeittan vilja hefur mér aldrei tekist að verða neitt annað en hlægileg eftirlíking. Einhverskonar töff light. Það gæti hinsvegar breyst. Í vikunni las ég nefnilega stutt viðtal í einu dagblaðanna við Snorra Óskarsson í Betel, þann mikla og víðsýna hugsuð. Snorri fullyrðir í viðtalinu að samkynhneigð sé í tísku! Þetta er náttúrulega hrein opinberun fyrir okkur amlóðana sem höfum þurft að þola hí og spé sökum hallærisgangs og afdalaháttar alla tíð. Nú þarf ég bara að dömpa henni Þóru minni og byrja að hommast af krafti útum borg og bí. Þar með er ég dottinn í tísku um stundarsakir. Orðin svalur gaur. Töff. Þegar svo tískubólan springur þá fer kynhneigðin bara sömu leið og Millet úlpan mín, Buffaló skórnir og töfrateningurinn. Beint í ruslið.

Þótt Snorri í Betel sé ekki samkynhneigður, og þar af leiðandi ekki í tísku samkvæmt eigin skilgreiningu, þá eru aðrar ástæður fyrir því hve yfirmáta hallærislegur hann er. Hann er fyrst og fremst púkó vegna þess að hann felur fordómana sína og umburðarleysi á bak við Guðsorð. Og það er aumt.

Sitt lítið...

2006-08-10T00:22:00.000Z

Ég er með eina ósk. Ef stjórnmálamenn ætla að breyta lífeyrissjóðum landsins þannig að þeir hætti að hámarka inneign mína og fari þess í stað að fjárfesta útfrá einhverjum félagslegum markiðum, - veri þeir þá svo vænir að afnema skylduaðildina fyrst. Ef það stendur til að sparka í punginn á hálaunaofurforstjórum þessa lands, þá vinsamlegast notið eitthvað annað barefli en lífeyrissparnaðinn minn.

Magni er á beinu brautinni í Súpernóvunni. Hann þarf að klúðra biggtæm til að komast ekki í þriggja manna úrslit. Hann á næga inneign hjá súpernóvugaurunum til að komast áfram, þótt honum fatist flugið eitt kvöld. Stelpan með rauða/græna/bláa hárið vinnur þetta samt. Mér finnst hún ekkert spes enda var ég aldrei hrifin af Marianne Faithful, sem hún stælir ákaft í söngnum. Tommy Lee og Navarro þurfa amk að klæðast öðruvísi ef þeir ætla að leyna hrifningu sinni á henni. Sá sem er með svalasta hugarfarið og attitjúdið í þetta jobb er samt Lúkas Rossi. Töffaralegt kæruleysið fleytir honum langt.

Ég má til með að benda á innblásinn pistil um Blönduóslögguna eftir meistara Howser. Hjörtur er með skemmtilegri mönnum og honum fer best að halda á penna þegar hann er hæfilega pirraður. Þessi reiða BA ritgerð um lögguna er skyldulesning. Og enn betri er pistill Hjartar um ofnotkun á bókstafnum N í íslensku máli. Brilljant blogg.

Gekk vel fyrir sig!!!

2006-08-08T22:21:00.000Z

Hátíðarhöld um verslunarmannahelgina gengu vel fyrir sig á Akureyri, sögðu sumir fréttamenn eftir helgina. Bæjarstjórinn á Akureyri var sama sinnis. Ekki nema 65 fíkniefnamál komu upp, grunsemdir um tvær nauðganir, höfuðkúpubrot, á annan tug bíla skemmdir og líkamsárásir í tugatali að sögn lækna á slysadeild. Og þetta var fjölskylduhátíð! Hvernig skyldu ættarmót fara fram hjá bæjarstjóranum og fréttamönnunum sem telja þessi ósköp til marks um vel heppnuð fjölskylduhátíðarhöld?

Ég var einn þeirra sem kom að Uxa hátíðinni árið 1995, enda tengdist hún útvarpsstöðinni Xinu en þar var ég dagskrárstjóri. Sú hátíð var eftirá nefnd eiturlyfjahátíð,enda var mikið sukkað þar. Eiturlyfjamálin sem þar komu upp voru innan við 30. Þau voru 65 á Akureyri. Auðvitað voru fleiri á Akureyri en Uxa, en á fyrrnefndu hátíðinni var fjölskyldufólk fyrirferðamest. Hlutina á að kalla sínum réttu nöfnum. Svallið verður ekkert skárra þótt fjölskylduforskeyti sé klínt á það og bæjarstjórinn skemmti sér vel.

Hér áður fyrr lagði ég mitt af mörkum - svikalaust - til að svallhátíðir bæru nafn með rentu. En ég varð sem betur fer lítið var við þessa ljúfu stemmningu sem sveif yfir vötnum á Akureyri, þar sem ég var ekki viðstaddur hátíðina sjálfa. Enn síður tók ég eftir vöruskortinum í bænum sem sagt var frá í fréttum um helgina. Þar sem ég kom voru allar búðir fullar. Og þótt kannski hafi vantað indverskt krydd í eina búð, steinseljurót í aðra og Lucky Charms í þá þriðju, þá er fulllangt gengið að tala um vöruskort.

Hlaðbakur

2006-08-04T00:46:00.000Z

Að fara með þrjú börn útúr bænum yfir eina helgi er mikil fyrirhöfn. Ekki síst þegar eitt barnanna er ungabarn og annað er þriggja ára. Þetta er nánast einsog að flytja til útlanda. Sem stendur er bílakostur fjölskyldunnar þannig samansettur að brandararnir um fílana og Volkswagen bílana eru að öðlast nýrri og dýpri merkingu. Í það minnsta er nógu mikið vesen að koma einum fjandans barnavagni fyrir í skottinu á Corollu station. Endar sennilegast með því að einu barninu verður komið fyrir í tengdamömmuboxinu. Einsgott það verði stöööð á Akureyri um helgina. Og að veðurfréttamaðurinn úberhressi hafi nú klankast á rétta spá, mitt í öllu fjörinu.

Þar sem hin afskekkti höfuðstaður norðurlands er ekki tengdur við alnetið/víðnetið/internetið/netið, þá blogga ég lítið næstu daga. Nást GSM símar þarna? Hvað með heit vatn? Sundlaug?

Hnegg

2006-08-03T00:55:00.000Z

Hestaferðin var svona lala. Það þarf amk verulega skreytni til að kalla þetta gandreið á glæstum fáki. Þetta var meira svona lull á ólseigri truntu í hópi barna og erlendra ferðamanna. En veðrið var æðislegt, náttúran falleg og svo mátti náttúrulega ekki ofgera Þóru og Kristínu Ölmu.

Hesturinn sem ég var á hét Komma. Mér finnst það bera vott um ákveðin frumlegheit að skíra truntu í höfuðið á greinamerki. Ég hef því lagt drög að því að ríða út á Gæsalöppum í næstu ferð. Eða Sviga. Þar sem Komma var frekar slöpp til útreiðar var hún á heimleiðinni kölluð semikomma. En það var ekki fyrr en ég var búin að lesa aulabrandarabókina upp til agna.

Ekki held ég að þessi túr verði til þess að Kórsalafamilian taki hestabakteríuna einsog sumir voru að vona. Guði sé lof fyrir það.

Ég finn ekki fyrir rasssæri einsog sést á þessari mynd:

Aktívismi og afturendi

2006-08-02T12:29:00.000Z

Mikið hefur súsurum tekist vel upp við að vekja athygli á álagningaskránum. Þeir hljóta að vera vel sáttir. Með ekkert annað en þokkalega ígrundaðan aktívisma að vopni tókst þeim að fá fáránlega mikil viðbrögð og umtal um þetta einkabeibí sitt. Einkum hafa pólitískir andstæðingar þeirra borið uppi umræðuna, yfirleitt pirraðir yfir því að aðrir en vinstri menn leyfi sér að ástunda aktivisma. Hef samúð með því sjónarmiði því í mínum huga er aktívismi tengdur lopapeysum og úfnu hári órjúfanlegum böndum. Auk þess á bindisklætt fólk hvorki að hlekkja sig við jarðýtur né skattaskrár. Annars virðist mér að langflestum sé nákvæmlega sama þótt þessar upplýsingar liggi úti á torgum. Helst heyrist kvein í þeim sem eru í úrtaki tekjublaðs frjálsrar verslunar. Þeir eru reyndar líka til sem hafa samband við blaðið að fyrra bragði til að komast í það. Því fólki vorkenni ég óskaplega mikið.

Er að fara í hestaferð í dag. Því verða nákvæmar lýsingar á rassi mínum í næstu færslu. Með grafískum hætti og latneskum heitum verða þjóhnapparnir krufðir með tilliti til ástands og útlits eftir gandreið á glæstum fák. Vel má vera að ljósmyndir í lit, auk listrænna svarthvítra mynda, fylgi færslunni. Ef ekki af mér, þá að minnsta kosti af Þóru.

Lifi skattmann...eða hvað!

2006-08-01T12:01:00.000Z

Ég vil bara nota tækifærið og þakka Indriða H Þorlákssyni, ríkisskattstjóra, kærlega fyrir aurinn. Það virðist vera metnaðarmál hjá skattinum að ég sé sómasamlegur klæddur, í það minnsta gat ég ekki skilið þessa rausnarlegu gjöf öðruvísi en að ég ætti að kaupa mér mikið af fötum. Til að eyða öllum misskilningi skal hér skýrt tekið fram að þótt Indriði hafi reddað aurnum, fékk hann ekki að velja fötin. Ef gjöfin hefði verið skilyrt með þeim hætti, þá hefði verið skárra að skulda skattinum.

Sá einhversstaðar að Sigurður Bollason og Magnús Ármann, athafnamenn, eru ekki með nema um hundrað þúsund krónur á mánuði samkvæmt opinberum tölum. Það er augljóst á öllu að það er ekki tekið út með sældinni að eiga stóran hlut í arðsömu flugfélagi sem metið er á milljarða. Til að vera nú heiðarlegur þá verður maður auðvitað að geta þess að þeir gætu hafa þurft að borga fjármagnstekjuskatt. En það er skattur sem er sérstaklega settur á til að illa staddir milljarðamæringar þurfi bara að greiða 10 prósent af tekjum sínum í skatt, á meðan venjulegt fólk borgar meira en 35 prósent af tekjum sínum í skatt. Góður guð gefi Sigga Bolla og Magnúsi Ármann styrk á þessum erfiðu tímum.

Nú er ég farin að blogga einsog Ögmundur Jónasson. Þá er komin til til að setja punkt.

Af vígvöllum og krúttum

2006-07-31T02:26:00.000Z

Orðin “blóðugur vígvöllur” komu einu sinni fyrir í fréttunum á sunnudagskvöld. Ekki útaf fjöldamorðum á börnum í Líbanon, heldur í tengslum við áflog einhverra lúsera í miðborg Reykjavíkur þar sem einn missti næstum eyra. Símon Birgisson á NFS á heiðurinn af þessari orðanotkun og ég legg til að stöðin flytji hann yfir í erlendu fréttirnar. Úr því að stympingar í bænum eru “blóðugur vígvöllur” þá hlýtur hann að finna eitthvað krassandi yfir viðbjóðin í Líbanon.

Í kvöldfréttum útvarps voru svo miklar bollaleggingar um hvort slagsmálin í miðbænum væru einkenni á þjóðarsálinni. Nú á fólk auðvitað að reyna að forðast að rífa eyrun af samborgurum sínum og engin ástæða til að gera lítið úr slíkum óþverraskap. En fanta og fautaskapur fárra vitleysinga verður ekki þjóðareinkenni á meðan slík hegðun er fordæmd af þorra landsmanna. Og til allrar blessunar sváfu langflestir íslendingar á sínu græna eyra þessa nótt en voru ekki með það lafandi útá kinn.

Annars á Ófeigur Þorgeirsson, yfirlæknir á slysadeild, sterka innkomu í þessum málum. Í útvarpinu sagði hann ástandið ekki minna á miðborgarlíf í evrópskri höfuðborg hjá menntaðri þjóð, heldur líkist atgangurinn fremur átökum á hafnarsvæði í stórborg í Bandaríkjunum. Menntuðu Evrópubúarnir slást ekki, það gera bara bullurnar í bandaríkjunum segir þessi víðsýni yfirlæknir sem augljóslega þekkir ekki fordóma nema bara af afspurn . Hann ætti að ganga nokkrar ferðir í gegnum slömmin í London, París og Madrid. Þar er þá væntanlega engin fátækt, slagsmál, vændi og eiturlyfjaeymd. Þar yrkja allir menntuðu Evrópubúarnir ljóð og mála landslag á milli þess sem þeir kryfja Hegel og Kant. En kaninn boxar!

Sigurrós var snilld. Jaðrar samt við föðurlandssvik að taka ekki Flugufrelsarann á svona giggi. Hápunktarnir voru fyrsta uppklappslagið og lokalagið. Hef alltaf þráð að vera hluti af krúttkynslóðinni og fór í sigurrósargallanum á giggið.

Veðurskip Líma

2006-07-29T17:41:00.000Z

Hvað er Sigga stormi gefið áður en hann þylur upp veðurfréttirnar á NFS? E töflur? Hann er nánast að fara yfirum af hressi. Hann er óneitanlega öðruvísi en flestir kollegar hans sem segja veðurfréttir nánast með trúarlegum áherslum. Stundum er svipuð stemmning í veðurfréttunum hér á landi og góðri messu. Frekar döll semsagt. Siggi kýs að poppa þetta hressilega upp og ég kann vel við Sigga. En hann þarf að passa sig á að breyta ekki gigginu í eitthvað standupp. Ég vil nefnilega gjarnan trúa því þegar Siggi segir okkur að von sé á fárviðri í Kórsölunum en geri það síður ef hann er flissandi með trúðshatt. Á góðum degi er Haraldur Ólafsson samt bestur í veðrinu. Skemmtilega háðskur stundum. En hvað er ég að blogga um veðurfréttir? Þekki ekki mun á háþrýstisvæði og vanilludropum.

Fótbolti, framhjáhald, fjölmiðlar og Loghildur

2006-07-28T15:25:00.000Z

Nú er Arsenal að selja Ashley Cole . Sjónarsviptir af þeim bakverði, enda er hann frábær í sinni stöðu. Ég set hinsvegar spurningamerki við gáfnafar mannsins. Hann er í takmarkalausri fýlu útí Arsenal af því að félagið bakkaði hann ekki upp þegar hann átti í ólöglegum viðræðum við helsta keppinautinn, Chelsea . Djöfull ætla ég að vona að kona Ashley Cole haldi framhjá honum með mesta óvini hans. Og að hún sæki svo um skilnað á þeirri forsendu að eiginmaðurinn hafi ekki veitt henni nægan stuðning við framhjáhaldið!!! Það væri sama siðleysið. Nú er bara að fá nógu mikið fyrir Júdas.

Fjölmiðlapistlar Kolbrúnar Bergþórsdóttur í Blaðinu eru ótrúlega fjölbreyttir. Þessi hárbeitta rýni hennar nær yfir ótrúlega vítt svið. Henni er ekkert óviðkomandi í fjölmiðlapistlum sínum, nema þá helst fjölmiðlar. Hún skrifar ekkert um þá.

Logi og Svanhildur fá æðislegar stuðkveðjur með von um gleðilegt uppeldi. Nú er bara að vona að barnið slefi minna en pabbi sinn og hjali ekki með norðlenskum framburði einsog mamman.

Salka

2006-07-24T16:33:00.000Z

Fór vestur á Snæfellsnes um helgina og lá þar í tjaldi ásamt Þóru og slatta af barnaskaranum. Það var stórfínt enda Arnarstapi fallegur staður. Ég komst að því þessa helgi að Salka er búin að fullkomna samskiptatæknina sem hún hefur verið að þróa frá því hún byrjaði að tala. Þetta er háþróuð tækni sem þriggja ára barnið notar til að vefja fullorðnu fólki um fingur sér af svo mikilli leikni að hrein unun er að fylgjast með. Í göngutúr um svæðið sagði hún uppúr einsmanns hljóði, greinilega orðin þreytt á labbinu: “Pabbi, ég elska þig, viltu halda á mér”. Barnið þurfti ekki að ganga neitt það sem eftir lifði helgarinnar.

Meðganga

2006-07-20T14:58:00.000Z

Nú er í gangi merkileg tilraun hér á Íslandi. Einsog allir vita er venjuleg meðganga 9 mánuðir og hefur svo verið um langa hríð. Flest venjulegt fólk hefur sætt sig við þennan gang náttúrunnar og eignast börnin sín á tilsettum tíma enda umtalsvert hagræði sem felst í þessari stöðluðu meðgöngulengd. Logi og Svanhildur, stórvinir mínir, þurfa hinsvegar alltaf að vera öðruvísi. Flippaðari en við hin. Þau stefna nú ótrauð á að setja einhverskonar meðgöngumet þarna fyrir norðan. Stefnir í 10 mánaða meðgöngu. Með sama áframhaldi fæðist barnið altalandi og með tennur. Jafnvel fermt. Svanhildur, koma svooohhh........

Hvað er í gangi?

2006-07-19T11:35:00.000Z

Shit hvað mér brá þegar ég vaknaði í morgun. Ég opnaði augun og nánast æpti af undrun. Og hræðslu, því ég er alltaf skíthræddur við hið óþekkta. Það var nánast einsog ókunnugur maður væri komin inní íbúðina og það er ekki skemmtilegt að vakna undir þeim kringumstæðum. Ekki gat ég annað gert en að taka á mig rögg og kanna málið. Hvað var eiginlega í gangi? Var hætta á ferðum? Á nærbuxunum, svefndrukkinn og með stírur í augum, klöngraðist ég frammúr. Þrátt fyrir miklar vangaveltur, bollalengingar og spekúlasjónir er þetta enn mikill leyndardómur. Áköf leit á netinu og spjall við sérfræðinga hefur heldur ekki skýrt málið. Hvað er þetta stóra, gula og heita á himninum?

Magni er með þeim flottari í súpernóvunni. Flott lag sem hann valdi og hann söng það frammúrskarandi vel. Ef hann heldur áfram á sömu braut og lagar aðeins sviðsframkomuna þá nær hann býsna langt. Annars er ég kominn á þá skoðun að það sé best fyrir Magna að lenda í öðru sæti í Rock star Súpernova. Þá fær hann hámarksathygli, án þess að þurfa að fara í tónleikaferð með Tommy Lee. Að keppast um að komast í hljómsveitina hans, er einsog að æfa sig markvisst fyrir kviðslit.

Fíkn

2006-07-17T17:43:00.000Z

Sorglegt þegar efnilegt fólk missir tökin á lífi sínu. Það er þyngra en tárum taki að horfa uppá hana Þóru þessa dagana berjast við fíknina. Fíkn sem rænir hana getunni til að stjórna eigin lífi. Mynstrið þekki ég og óttast, því allir fíklar skemma útfrá sér. Þeir vanrækja fjölskylduna. Sinna vinnunni illa. Verða viðskotaillir. Þeir missa þá reisn sem fylgir því að vera frjáls. Og í verstu tilfellum hættir fíkillinn að vera manneskja. Sem betur fer er hún Þóra mín ekki komin á botninn. En hún nálgast hann hratt. Neitar að horfast í augu við vandann og taka á honum. Afneitunin er svo sterk. Ótrúlegt hvað japanskar talnaþrautir á netinu geta leikið fólk grátt. Veit einhver hvar Sodukofíklar geta leitað sér hjálpar? Kannski er 12 spora kerfið málið.

Starfsheiti og piparkökusöngurinn

2006-07-16T18:42:00.000Z

Ég hef ákveðið fetish fyrir góðum starfsheitum. Því lengri starfsheiti, því flottara er fólkið sem gegnir starfinu. Ég ber því óendanlega virðingu fyrir manneskjunni sem er sviðsstjóri þjónustusviðs Landsbókasafns Íslands -Háskólabókasafns. Hvað er nafnspjaldið stórt? Ef þið vitið um flottari titil þá er tuðskjóðan opin!

Nááár dú pepperkager bager
kake machermannen tager
erst am immer steikarpottinn
únd æn kíló....PEEPPPPEEER!!!

Hver þýddi og af hvaða tilefni?

2006-07-12T18:49:00.000Z

Sá Magna í nótt í Súpernóvunni. Hann var hundrað sinnum betri en í fyrsta þættinum og reyndar miklu betri en flestir aðrir keppendur í gærkvöldi. Gangi honum vel. En óttalega finnst mér þessir Súpernóvumenn miklir aular. Jason Newsted sem var í Metalica, er eini maðurinn sem segir þarna eitthvað af viti. Gilby Clarke er froða og svo er það sjónvarpáhorfendum sífellt undrunarefni að Tommy Lee skuli yfirhöfuð geta haldið á trommukjuða, jafn greindarskertur og hann er. Satt best að segja er ég spenntari fyrir næsta valentínusardegi en plötu með þessu rokkbandi. En þetta er skemmtilegt sjónvarp. Hvað gerist svo ef Magni vinnur? Er ekki borðleggjandi að skjár einn býr til íslenskan raunveruleikaþátt þar sem hljómsveitin Á móti sól finnur sér söngvara? Pant ekki horfa á það!

Ég er smásál.

2006-07-11T18:02:00.000Z

Þrár vikur af sumarfríi búnar og ég er mættur til vinnu á ný. Ekki sá til sólar í fríinu að neinu ráði. Það kom þó sólarglenna einn dag á meðan ég var uppí bústað, en þá var jafnframt svo köld norðanátt að það kom hrím á sólgleraugun mín. Að auki fékk ég kalbletti á upphandleggina eftir að hafa í takmarkalausu bjartsýniskasti klæðst stuttermabol þennan sólardag uppúr miðjum júní. Um helgina skein hinsvegar gula fíflið af áður óþekktu kappi. Ég var sannfærður um að í hönd færi hitabylgja sem stæði út Júlí, eða nákvæmlega þann tíma sem verð fastur í vinnunni. Ekki virðist þetta ætla að rætast því úti er rok, rigning og drulla. Litla smásálarhjartað mitt tekur aukaslög af fögnuði yfir þessari ömurlegu veðráttu því á meðan ég er sjálfur fastur í vinnu, verður helst að rigna eldi og brennisteini. Skítt með fólkið sem er í fríi á sama tíma. Gott veður er nefnilega takmörkuð gæði. En sanniði til, hitametin eiga eftir að falla í hrönnum frammað næstu mánaðarmótum. Og ég þori að veðja efrigómnum mínum uppá að ágústmánuður verður svo kaldur að keisaramörgæsir verpa í tjarnarhólmanum uppúr miðjum mánuði. Enda verð ég í frí þá.

Ballið búið.

2006-07-09T22:43:00.000Z

Frakkar miklu betri en Ítalía vann. Svona er fótboltinn grimmur. Ekki ætla ég samt að amast mikið við sigri Ítala, því þeir eru með frábært fótboltalið. Og leikurinn var hrein snilldarskemmtun. En svo sannarlega hefðu frakkar verðskuldað sigurinn í kvöld.

Nokkrar pælingar:

Hvað var Zidane að pæla? Þetta var hallærislegra en pungssparkið hans Rooney? Óréttlætanlegt með öllu.

Af hverju þorði dómarinn ekki að dæma víti í seinni hálfleik? Var það vegna þess að Frakkar fengu víti fyrr í leiknum?

Af hverju var Arnar Björnsson alltaf við það að fá fullnægingu í hvert sinn sem Ítalskir varnarmenn hreinsuðu uppí stúku?

Hvernig líður Henrý? Tapar úrslitaleik á HM og í meistaradeildinni með nokkurra vikna millibili.

Hingað til hafa ítalskir knattspyrnumenn verið ámóta miklir harðjaxlar og dverghamstrar í bleikum pífuskyrtum. Hvaðan koma þá Gattusó og Cannavaro? Þeir eru úbersvalir. Sömuleiðis fíla ég þennan Grossó vel.

Ef marka má Arnar Björns þá var það Tresequet sem skoraði úrslitamarkið í úrslitaleiknum á evrópumótinu fyrir tveimur árum. Það sagði hann ítrekað í lýsingunni. Soldið gaman fyrir þennan franska landsliðsmann að hafa náð að skora í leik á milli Grikkja og Portúgala!! Annars var Arnar góður að venju og ég hef mikla samúð með svona meinlokum í hita leiksins í beinni lýsingu. Kemur fyrir á bestu bæjum.

Sýn hefur afgreitt þetta heimsmeistaramót frábærlega. Tek ofan fyrir þeim. Rúv er með mótið næst. Vonandi verður þetta ekki síðra þá. Takk fyrir mig.

Súpernóva og aukatekjur.

2006-07-06T22:57:00.000Z

Horfði á rokkstar súpernóva í nótt, en get ekki sagt að ég hafi heillast. Ég horfði hinsvegar á rokkstar INXS með miklum áhuga síðasta vetur, sem er skrítið í ljósi þess að mér finnst INXS ömurlegt band. En vafalitið dettur maður inní Súpernóvuna líka, enda hafa tónlistarmennirnir þar spilað með skárri böndum en INXS. Þar undanskil ég reyndar Tommy Lee sem er óþroskaður getuleysingi frá vangeflingalandi.

Ég held að Magni geti nú gert talsvert betur en hann gerði í gær. Mér fannst hann óöruggur á sviðinu og á köflum öskraði hann alltof mikið. Lagavalið hans var glatað. Ekki troða upp með ofnotuðustu rokklummu allra tíma í svona þætti, þar sem þú færð tvær mínútur til að heilla áhorfendur og bandið! Væntanlega var það gert til að fá salinn strax með, en drottinn minn dýri, þetta er þreyttasta rokklag allra tíma. Aðeins meiri frumlegheit næst, Magni.

Ég sá í fréttunum að kunningi minn, Stefán Kjernested, gerir það gott sem leigusali. Hann leigir tæplega 100 fermetra íbúð á 250 þúsund kall á mánuði til nokkurra Pólverja. Sjálfur á ég 12 fermetra geymslu sem fylgir íbúðinni minni í Kórsölum og er lítið notuð. Hún er gluggalaus, en hlý. Hér með býð ég Stefáni að búa í geymslunni minni fyrir 30 þúsund krónur á mánuði. Hann hlýtur að taka þessu kostaboði, enda er þetta nærri þeim standard og verði sem hann býður sjálfur uppá. Hann fær að skjótast á klóið hjá mér að auki ef hann bætir 5 þúsundkalli við.

Um gildi leikrænnar tjáningar.

2006-07-06T00:27:00.000Z

Nú ætla ég að játa soldið. Ég fer ákaflega sjaldan í leikhús. Og ég þekki fáa leikara. Af því leiðir að ég hef mjög lítið vit á leiklist. Mér er sagt að með leikrænni tjáningu sé nánast hægt að gera allt mögulegt, meðal annars yfirvinna tilfinningalegar og líkamlegar hömlur. Og að sjálfsögðu blekkja fólk. En hvað er drama? Hvað er kómedí? Hvað er spuni? Hvað er látbragðsleikur? Ekki er ég viss um að ég geti svarað þessum spurningum af neinni dýpt eða vissu. Þetta yfirgripsmikla þekkingarleysi mitt á leiklist þýðir að ég get ekki tjáð mig um frammistöðu knattspyrnuliðs Portúgals í leiknum í kvöld. Hef þó lúmskan grun um að orðið harmleikur nái ágætlega yfir þessa wannabe leikaraskratta sem hrundu einsog flugur í hvert sinn sem komið var við þá. Ömurlegt fótboltalið sem komst alltof langt í þessari keppni.

2006-07-05T00:05:00.000Z

Í dag ég stoltur af henni Kristínu Ölmu minni. Hún náði bóklega hluta bílprófsins með glans og því stutt í að hún hrelli ökumenn með leikni sinni úti í umferðinni. Til hamingju.

Ítalía vann. Af því dreg ég þá ályktun að guð almáttugur lesi ekki bloggið mitt á þriðjudögum, sbr síðustu færslu. Ekki græt ég þó tap þjóðverjanna neitt sérstaklega. Ítalir voru þeim einfaldlega fremri í kvöld. Fyrir nú utan að ég fíla þennan Gattúsó gaur í botn, enda er hann ekki dæmigerður ítalskur leikmaður sem hrynur gólandi til jarðar ef hóstað er inná vellinum. Annars ætla ég að halda áfram að hatast við suður Evrópuþjóðir í fótbolta. Og ef slímugar geimverur sem nærast á litlum börnum fengju þáttökurétt á HM, þá héldi ég með þeim gegn Portúgal. Ef ég verð ekki bænheyrður á morgun, þá tek ég til í geymslunni frekar en að eyða tíma mínum í úrslitaleikinn. Svo einfalt er það. Tottí á móti C. Ronaldo er ámóta heillandi konsept og mynd með Söndru Bullock og Keanu Reeves í aðalhlutverkum.

Bæn

2006-07-04T01:43:00.000Z

Góði guð. Ég leita ekki oft til þín. Skammarlega sjaldan reyndar. Það þýðir samt ekki að ég trúi ekki á náðina, mátt þinn og hlýju. Ég hef bara verið upptekin við að skara eld að eigin köku, syndga og sigra í lífsgæðakapphlaupinu. Ekki haft tíma til að vera í sambandi. Sorry. En kæri guð, núna eru slíkir atburðir að gerast að inngrip frá æðri máttarvöldum eru brýn, já ef ekki lífsnauðsynleg. Til að sálarheill mannkyns verði ekki stefnt í voða verður þú, sem allt getur, að grípa inní mannlífið líkt og þú hefur svo oft gert, okkur til heilla. Í mestu einlægni og frá innstu hjartarótum bið ég þig, kæri guð minn góður, að forða oss frá þeirri hneisu og leiðindum, að þurfa að horfa á Portúgal – Ítalíu í úrslitaleik HM. Plís.

Ekki afi enn!

2006-06-29T18:15:00.000Z

Ekki er laust við að mér sé nokkuð létt eftir atburði dagsins. Dóttir mín, hún Kristín Alma, sem er 18 ára gömul, hefur þráfaldlega sagt mér að ég sé örugglega að verða afi. Svo ég sé alveg hreinskilinn þá hefur þessi tími verið svolítið skrítinn því ég er ekki tilbúinn í þennan pakka alveg strax enda ekki nema 37 ára gamall. Á nóg með mín fjögur börn hér á heimilinu. Dóttir mín hefur staðið fast á sínu þótt augljóslega hafi hún nú verið leið yfir þessu. Ég fann til með Kristínu Ölmu enda erfitt fyrir 18 ára ungling að sjá fram á fjölgun í fjölskyldunni. Við þráuðumst við í nokkurn tíma en á endanum varð ekki undan því vikist að kanna hvort storkurinn væri á leiðinni. Við völdum þá leið að leita bara beint til læknis. Okkur fannst það skynsamlegast þar sem hún átti að vera gengin þetta langt með. En eftir að læknirinn hafði þreifað á kviðnum hennar kom í ljós að ég þarf ekki að óttast afahlutverkið enn um sinn. Kötturinn okkar hún Ronja er semsagt ekki kettlingafull. Og verður ekki úr þessu, því hún var tekin úr sambandi.

Hjálp

2006-06-28T23:31:00.000Z

Bloggerhelvítið hefur einhverra hluta vegna fært linkana neðst á síðuna sem mér finnst ekki gott. Hver kann að laga svona? Vegleg verðlaun í boði fyrir rétt svar.

Myndavélar strax, takk fyrir!

2006-06-27T21:11:00.000Z

Frakkarnir áfram. Gott mál. Það þýðir að ég hef einhverjar taugar til tveggja liða af þeim átta sem eftir eru. Vonandi hrökkva Englendingar í gír og kála Portúgal, og það væri verulega sætt ef Frakkarnir lækkuðu rostann í þessum leiðinda Brössum. Er þó efins um að mér verði að ósk minni. Ætli fjögurra liða úrslitin verði ekki leiðindi dauðans, Portúgal, Brasilía, Ítalía og svo Argentína eða Þýskaland.

Hef verið gagnrýndur í kommentakerfinu fyrir að sýna ekki leik Sviss og Úkraínu áhuga. Láir mér það einhver í dag? Þessum liðum tókst ekki einu sinni að gera vítaspyrnukeppni áhugaverða!

Nú er orðið tímabært að nota myndavélar sem hluta af dómgæslu á HM og EM. Rangstæðumarkið sem brassarnir skoruðu í dag var náttúrulega hreint djók. Maðurinn var rangstæður í hlaupi frá miðjunni að markteig, án þess að línuvörðurinn sæi ástæðu til að veifa þegar loks sendingin kom. Í endursýningunni sést að hann hlýtur að hafa verið í lyfjarússi, vesalings fánaberinn á hliðarlínunni. “Vítið” sem ítalir fengu í gær er af sama meiði. Rauða spjaldið sem þeir fengu á sig í sama leik er enn eitt málið. Og hægt er að telja til tugi atriða til viðbótar, bara á þessu móti. Þeir sem vilja ekki myndavélar nota auðhrekjanleg rök. Förum yfir nokkur þeirra:

Ef við notum myndavélar þá fækkar vafaatriðum og það verður minna að tala um eftir leikina: Skiptir sanngirni og réttlæti í dómgæslu á HM minna mál en réttur kjaftaska í sjónvarpssal??? Með þessum rökum er hægt að tala sig inná að enn verri dómgæsla sé af hinu góða, því þá verður enn skemmtilegra að kjafta um leikina. Nema náttúrulega fyrir þá sem falla úr keppni útaf einum lélegum dómi.

Leikmenn gera mistök líkt og dómarar. Hluti af leiknum. Auðvitað eru mistök hluti af leiknum. En mistök Rónaldós bitna á honum sjálfum og hans eigin liði. Mistök dómarans bitna á öðru liðinu, ekki honum sjálfum. Fyrir nú utan að með þessari röksemd eru menn að segja að ósanngjörn og röng dómgæsla sé af sama meiði og að hitta ekki boltann fyrir opnu marki! Klúður dómara er verra, því það er hans að gæta að réttlætinu inná vellinum.

Það hægist á leiknum: Í leik Portúgals og Hollands var spilaður fótbolti í 30 mínútur af 45 í seinni hálfleik. Dómarinn þurfti ekki myndavélar til að hægja á þeim leik. Engin vill nota myndavélar í öllum vafaatriðum. En má ekki nota þau í umdeildum mörkum, þegar vafi leikur á hvort bolti fari yfir marklínu, í rauðum spjöldum svo dæmi séu nefnd? Varla fleiri en fjögur atriði í leik. Tekur aðstoðardómara með nútímatækni svipaðan tíma og fyrir þjálfara að skipta um leikmann. Einnig mætti hugsa sér að lið mættu áfrýja til myndavélanna tvisvar í leik, hvort lið, frekar en að dómari ráði hvenær upptaka er skoðuð. Punkturinn minn er þessi : það er ekkert mál að útfæra þetta þannig að leikurinn fái að flæða og bara afdrifaríkustu atriðin fái skoðun, en ekki hvert einast innkast í leiknum.

Staðreyndir lífsins.

2006-06-26T22:53:00.000Z

Það rignir á íslandi á sumrin!

Ítalir komast áfram á HM með svindli á lokamínútunum!

Kjánar tjá sig um málið á Sýn!

HM leiðindin

2006-06-25T22:57:00.000Z

Jæja. Það var tiltekt á mettíma og brjáluð læti uppí bústað til að ná heim í tæka tíð. Hvorki fyrr né síðar hef ég haft meira fyrir því að horfa á fótboltaleik. Pungsveittur og andlega búin á því eftir bíltúrinn settist ég fyrir framan sjónvarpið og horfði á leik Englendinga og Ekvador. Skemmst er frá því að segja að leikurinn var ámóta heillandi og gott mígreniskast. Þvílík og önnur eins leiðindi. Englendingarnir voru ámóta ferskir og úldið kattahland en unnu samt. Kannski að Þýska heilkennið, sem þróast hefur á undanförnum áratugum, hafi skotið sér niður í Enska landsliðinu! Frábær mannskapur, leiðinlegt lið, lélegir leikir og sigur. Þýska heilkennið er amk ekki hjá Þjóðverjum að þessu sinni því þeir eru frábærlega skemmtilegt lið, aldrei þessu vant.

Um leik Hollands og Portúgal hef ég fátt að segja. Þetta var skrípaleikur en ekki fótboltaleikur. Bæði lið gróf og dómarinn ömurlegur. Hollenska liðið er ekki nógu gott, svo einfalt er það og ég vil ekki sjá mína menn svona grófa. Brotið á rónaldó var td vibbi. Fígó var hinsvegar mesti asni leiksins og verður vonandi í banni næst. Megi Portúgalar detta út í næstu umferð með miklum bravúr. Annað stórmótið í röð ná þeir þeim stórkostlega árangri að vera leiðinlegri vælukjóar en Ítalir. Ótrúlegt afrek það.

Ég ætla að horfa á Ástrali slá út Ítali á morgun. Ástralir eru óvænta þjóðin að þessu sinni. Svo er Sviss – Úkraína annað kvöld. Ég vökva garðinn frekar en að eyða tíma í slíkar leiðindaþjóðir.

Eureka!

2006-06-24T01:09:00.000Z

Það er ekki gott að hlaupa langhlaup tveimur klukkutímum eftir að maður hefur gúffað í sig stórum hamborgara, helling af frönskum, kokteilsósu og skolað því niður með hálfum lítra af kók. Það er heldur ekki gott að hlaupa langhlaup mjög dúðaður því þá verður manni of heitt. Og ef maður fækkar fötum of skarpt í nepjunni, þá verður of kalt. Þessar ótrúlegu uppgötvanir gerði ég í kvöld.
Kær kveðja,
Albert Einstein.

P.S.

Á morgun ætla ég að kenna ykkur að kljúfa atóm.

2006-06-23T00:04:00.000Z

Í dag er ég í klemmu. Mig langar að búa til súrrealískt blogg, en ég nenni því ekki. Mörður Árnason má því eiga sviðið, enda ekki nokkur leið að toppa hann.

MEEEEEEEH!!!!!!!!!!!!!!

2006-06-20T22:34:00.000Z

Notalegt að vera í sveitinni. Vaknaði klukkan 6:30 við síendurtekið, hávært og átakanlega leiðinlegt jarm í rollu sem greinilega var í mikilli geðshræringu fyrir utan svefnherbergisgluggann minn. Voljúmið á kindinni var stillt á 11, því nístandi óhljóðin glumdu um herbergið líkt og úr fínasta surrándkerfi frá bose. Velti því alvarlega fyrir mér að sálga kvikindinu með bitlausum ostaskera en tók frekar til þess bragðs að fara útí glugga og biðja skjátuna kurteisislega um að færa söngæfingar sínar yfir að næsta bústað. Litlu munaði að rollan dræpist úr hjartaáfalli þegar hún sá morðglampann í svefndrukknum augum mínum og hún hefur ekki sést hér í sveitinni síðan. Sem betur fer náði ég að sofna aftur og dreymdi þá fallegan draum um duglegt fólk við störf í fullkomnu sláturhúsi.

Sá leik Englendinga og Svía á HM. Flottur leikur! Úrslitin þýða að Svíar mæta Þjóðverjum í 16 liða úrslitum. Að velja lið til að halda með í þeim leik, er líkt og ákveða hvort maður vilji kafna í ælu eða drukkna í rotþró.

Riders on the storm

2006-06-19T21:45:00.000Z

Á íslensku eru til ótrúlega mörg orð yfir veðurfar. Mörg orð má nota um rigningu. Votviðri, úrkoma, skýfall, úrfelli, suddi, væta, hraglandi og svo mætti lengi telja. Núna er ég búin að vera í sumarfríi í þrjá daga án þess að stytt hafi upp að viti. Hef því komist að þeirri niðurstöðu að það skiptir ekki nokkru einasta máli hve mörg orð eru á íslensku til yfir rigningarsuddann. Þau eru öllu ómöguleg því þau fanga ekki á nokkurn hátt þau hughrif sem flestir verða fyrir þegar droparnir falla í milljónatali til jarðar, sólahringum saman. Legg því til að orðinu viðbjóður verði bætt við flóruna. Þá er hægt að tala um rigningarviðbjóð, vætuviðbjóð, suddaviðbjóð, úrhellisviðbjóð eða þessvegna hraglandaviðbjóð. Þá gætu allir talað um helvítis viðbjóðinn þegar vísað er almennt til votviðris. Veðurfræðingar sem hallir eru undir popúlisma – og þá á ég helst við Sigga Storm – ættu að taka þessa orðanotkun upp hið snarasta.

P.s.

Þeir sem ætluðu að láta einhverja speki falla í kommentakerfinu mínu um hversu helvítis viðbjóðurinn fer nú vel með blessaðan gróðurinn, eru vinsamlegast beðnir um leita til sálfræðings. Slíkt bjartsýnis og rólyndishugarfar er nefnilega merki um alvarlega geðveilu. Sumarið hér á klakanum er 8-10 vikur forkræingátlát. Sól, takk fyrir. Strax. Annars er bara voða fínt hjá okkur uppí bústað.

17. Júní

2006-06-17T22:36:00.000Z

Dagurinn var svona hjá mér: Keyrði á japönskum smábíl, til að horfa á Nylon eftir að hafa fengið mér candy floss. Fór heim til að horfa á leik Gana og Tékka. Fór síðan og fékk mér kentucy fried og leit svo á leik USA og Ítalíu. Keypti Toblerone og Coka cola til að borða yfir myndinni Walk the line um Johnny Cash.

Ekta íslensk þjóðhátíð hefði hinsvegar litið svona út: Fór á íslenskum hesti til að horfa á þjóðdansa og hlusta á rímur í félagsheimilinu. Bruddi harðfisk og súrt slátur og kíkti svo á bændaglímuna. Orti hringhendu um lélega sláturtíð, áður en ég þambaði mysu yfir svart hvítri heimildarmynd um golsóttar lambær með mæðuveiki.

Niðurstaða: Þökk sé góðum guði fyrir alþjóðavæðinguna.

Gleðilega þjóðhátíð og áfram Holland.

Grátur

2006-06-16T18:08:00.000Z

Í gærkvöldi var mikið rætt um karlmennsku og tilfinningar á heimili mínu. Dóttir mín og Þóra vilja meina að ég sé tilfinningalaus hrotti af því að ég fór ekki að skæla yfir ömurlega illa leiknu og asnalegu atriði í Desperate housewives. Í framhaldinu kviknaði ófrjó umræða um að karlmenn sýndu aldrei tilfinningar, þyrðu ekki að gráta og byrgðu allt inni. Um tíma hékk sú fullyrðing í loftinu að flest sjálfsmorð ungra drengja mætti rekja til þess að ég felldi ekki tár þegar Eva Longoria reyndi af veikum mætti að leika örvæntingafulla móður að missa barnið sitt. Fullyrt var að eitthvað karlmennskuegó hefði stíflað tárakirtla mína. Ég væri bara karlpungur, holur að innan; tilfinningalaust macho skrímsli sem þekkti ekki fínustu blæbrigði lífsins og skynjaði hvorki gleði né sorg.

Mikið sárnaði mér að heyra þetta allt. Ég trúi því nefnilega að ég sé hlýr og tilfinningaríkur strákur. Ég hef grátið. Fellt tár og sýnt trega. Ég er nú ekki meira karlmenni en svo að fyrir skemmstu lagði ég höfuð mitt á öxl ókunnugs manns og grenjaði hátt. Með þungum ekka þuldi ég faðirvorið, aðframkomin af tilfinningaríkri og djúpri sorg. Ekki saka mig um karlmennskupungatilfinningaleysi, því ég grét sárar en lítið barn þegar Arsenal tapaði fyrir Barcelona í meistaradeildinni á dögunum.

Ellismellur

2006-06-15T22:27:00.000Z

Eftir situr ráðherralið Sjálfstæðisflokksins og minnir mann einna helst á Kastljósið í Sjónvarpinu. Þar má finna bæði ungar konur og eldri menn en ekki hið gagnstæða, eftir einhverju náttúrulögmáli sem bæði sjónvarp og flokkur virðast trúa á.

Ármann Jakobsson, snilldarpenni á Múrnum og besservisser, virðist vera með aldursskilgreiningar á hreinu. Það vinna bara yngri konur og eldri menn í Kastljósinu! Ekki ætla ég nú að leggjast í vörn fyrir Þórhall Gunnarsson, Kristján Kristjánsson og Jónatan Garðarsson. Ef marka má Ármann eru þeir fullir bjartsýni á framtíðina vegna fyrirheita stjórnmálamanna um að hlúa betur að eldri borgurum. Bjartsýnir, en hrumir.

Ekki verður því heldur á móti mælt að Ragnhildur Steinunn, Þóra og Eyrun eru ungar konur, allar undir þrítugu, og þessi hnífskarpa greining Ármanns hárrétt hvað þær varðar.

En útfrá þessum orðum hans er ég soldið hugsi yfir stöðu minni, svona sem eldri maður samkvæmt skilgreiningu. Ég er fæddur árið 1969 og hef ekki lagt mikið til hliðar til elliáranna sem brustu svona óforsvarendis á þegar ég fletti í vinstrisinnuðu veftímariti. Það er hinsvegar spurning hvort ég ætti að smella í eina hárálitahræru til að vinna gegn öldruninni.

Samkvæmt þessari skilgreiningu ætti Jóhanna Vilhjálms að nýta tímann vel því sú góða vinkona mín er fædd árið 1970 og telst því gömul kona eftir ár eða þarumbil. Og vonandi lendir Ármann Jakobsson, jafnaldri Jóhönnu, ekki í teljandi vandræðum með blöðruhálskirtilinn þegar hann kemst í hóp okkar gamalmennanna eftir áramót. Og drottinn minn dýri, við skulum ekki nefna risvandamálin.

Svo er talað um æskudýrkun í sjónvarpinu!

Hér vantar góða fyrirsögn!!!

2006-06-14T23:09:00.000Z

Þegar á móti blæs er gott að geta haldið kúlinu. Það er reyndar ekki öllum gefið og fátt veit maður leiðinlegra en þegar fólk gefst upp. Við eigum alltaf að berjast áfram – þrauka – ef ekki vill betur, því mótlætið getur hert okkur. Mér þótti því leiðinlegt fyrr í kvöld að sjá dóttur mína og Þóru, þrjóta öreindi í erfiðri baráttu . Lyppast niður einsog aumingja, vegna þess að aðstæður voru þeim ekki hagfelldar. Að rjúka í panikki í ljósatíma, þótt hann rigni nokkra daga í sumarbyrjun, er uppgjöf. Megi góður guð vaka yfir þeim á erfiðum tímum.

Ég verð víst að teljast aum fótboltabulla. Hef séð einn heilan leik á HM það sem af er, einn fyrri hálfleik og svo bara brot úr leik hér og þar. Hef þó náð flestum mörkum í þættinum 4-4-2. Ástæðan er skrambans vinnan sem slítur ekki bara í sundur fyrir manni daginn, heldur eyðileggur einnig HM. Nú er þriggja vikna sumarfrí framundan og þá togast á leikirnir og fjölskyldan. Af hverju á ég ekki fjölskyldu sem er að keppa á HM? Af hverju er ég ekki í sambúð með Jurgen Klinsmann? Þá væri lífið talsvert auðveldara.

Vinur minn Þorsteinn J fer á kostum í þættinum 4-4-2. Hann hefur alltaf verið frábær í þessum fótboltaþáttum að mínu mati. Lifandi spyrill og frjór í efnistökum. Í dag skaut hann hinsvegar langt yfir markið í efnisvali. Auglýsingaviðtalið við framkvæmdastjóra Jóa Útherja um HM peysurnar sem eru búnar en ný sending sem betur fer væntanleg, var vandræðalega aumt. Koss Ingólfs Hannessonar á kinn Guðjóns Þórðarsonar um árið var hreinlega kúl í samanburðinum, þótt sá íþróttaatburður hafi framkallað aumingjahroll alla leið ofan í nára! En takk fyrir þáttinn samt, Þorsteinn og Heimir.

Roger Waters

2006-06-13T01:03:00.000Z

Roger Waters var flottur. Þetta var allt voða fagmannlegt hjá honum og ekki útá neitt að setja nema þá helst hvað þetta var langt prógramm. Að standa á sviðinu í tvo og hálfan tíma er bara bull og skiptir þá engu hvort þú heitir Roger Waters, Bubbi Mortens, Geir Ólafs eða Bananarama. 15 mínútna pissupása i miðju giggi breytir þar engu. Þetta var þrískipt, fyrst slagarar í klukkutíma eða svo, pása, síðan dark side of the moon og svo uppklapp sem samanstóð af þremur lögum af the Wall.

Hápunktar kvöldsins:

Wish you where here, frábært lag sem framkallaði gæsahúð á fleirum en mér í Egilshöll í kvöld.

Leaving Beirut: Magnaður texti, magnað lag. Frábært samspil tónlistarinnar, textans og teiknimyndarinnar sem sýnd var á tjaldinu á meðan á fluttningi stóð.

Time: Gæsahúðarmóment af dark side of the moon. Intróið í þessu lagi er með þeim flottari í tónlistarsögunni og þarna naut Nick Mason sín sérlega vel. Klassalag.

Comfortably numb. Lokalag tónleikanna. Eitt flottasta lagið af the wall. Að mínu mati er viðlagið eitt það besta í gervöllum geiminum.

Leiðindi kvöldsins:

Money: Þetta lag er náttúrulega nánast orðið þreyttara en I cant get no satisfaction með Stones. Flott lag í upphafi, en búið að nauðga úr því öllu lífi í gegnum tíðina. Slakasta lagið á dark side of the moon.

Another brick in the wall: Þetta er sömuleiðis orðið útjaskað, var þó skemmtilegra en Money. Salurinn tók eðlilega vel við sér þegar þetta var flutt. Leiðindi kvöldsins voru nauðsynleg leiðindi sem máttu ekki missa sín.

Hvað vantaði:

Goodbye blue sky. Flottasta Pink floyd lag allra tíma. Punktur.

Athyglisvert:

Roger Waters og Nick Mason eru forríkir menn og vita ekki aura sinna tal. Af hverju skyldu þeir alltaf ganga í sömu fötunum?

Tommís vs Biggís

2006-06-11T21:30:00.000Z

Vaknaði á óguðlegum tíma í morgun til að taka þátt í knattspyrnumóti sem ættingjar Þóru halda árlega. Þar mættust lið Biggís og Tommís. Skemmst er frá því að segja að Tommís unnu sannfærandi sigur og voru betri á öllum sviðum knattspyrnunnar. Með sigri Tommís má segja að íþróttin sjálf hafi sigrað því bola og óþokkabrögð Biggís settu ljótan svip á leikinn. Á meðan fótabúnaður Tommís voru hefðbundnir fiðurmjúkir íþróttaskór mættu Biggís í klossum með stáltá, auk þess sem átta tommu oddhvassir stáltakkar sáust á nokkrum leikmönnum. Þá kom það mér talsvert á óvart að sumir leikmenn Biggís skyldu mæta vopnaðir til leiks. Rýtingar og karatestjörnur eiga ekki neitt erindi inná knattspyrnuvöll.

Síðustu vikur hefur verið stríðsástand á heimilinu því Þóra hefur lagt mikið á sig við að koma mér í skilning um alvöru leiksins, baráttu uppá líf og dauða, þar sem ekki er tomma gefin eftir. Mér þótti því skrítið að Þóra þurfti að blása á sér hárið klukkustund fyrir leik, úða yfir sig hárspreyi og troða framan í sig maskara, ásamt öðru kvennadedúi sem ég kann ekki að nefna. Þá hafði ég enn frekari ástæðu til að efast um alvöru leiksins þegar ég mætti á leikvanginn og sá að keppnisliðin voru nánast eingöngu skipuð gamalmennum og börnum.

Til að auka ekki á niðurlægingu Biggís er rétt að rekja ekki einstök atriði leiksins frekar.

Nokkur ágreiningur reis eftir leik um það hvort liðið hefði í raun skorað fleiri mörk. Til að eyða allri óvissu fylgir hér stutt samantekt: Hver leikmaður Tommís skoraði að meðaltali eitt mark í leiknum. Hver leikmaður Biggís skoraði ekki nema 0,7 mörk í leiknum. Augljóst er því að Tommís sigruðu með nokkrum yfirburðum. Ja, ekki þá nema leikmenn Biggís hafi verið fleiri inná vellinum, en það væri nátturulega svindl og ljóst að Biggís viðurkennir ekkert slíkt

Þá að einkunnagjöf:

Flottasti búningurinn: Sóley Tómasdóttir. Hörð samkeppni var um flottasta búninginn því ræpurauði 30 ára gamli fishergalli Tómasar kom líka sterklega til greina.

Besti miðjumaðurinn: Þóra, Kristín og Sóley. Svo sannfærandi í hlutverkinu að þær hreyfðu sig ekki út fyrir miðjan völlinn.

Besti þjálfarinn: Auðvitað Þóra. Hún veit hvorki hvað sveeper eða bakvörður er og telst því algjört júník í þjálfarastéttinni.

Tuddi leiksins: Ekki er hægt að gera upp á milli Skarpa, Árna, Arnars og Snjólaugar. Útsjónarsemi þeirra í fautaskap, fláræði og svindli jaðrar við snilligáfu.

Tilgangslausasti leikmaðurinn: Guðrún Jónsdóttir. Hún toppaði Kötlu léttilega í tilgangsleysinu þótt sú yngri hafi sofið útí vagni allan leikinn.

Flottasta markið: Mjög erfitt að gera upp á milli fyrsta, annars, þriðja, fjórða og fimmta mark Zygmarrs. Hin fjögur mörkin hans voru einnig mjög glæsileg.

Röng forgangsröð ríkisstjórnarinnar

2006-06-10T23:48:00.000Z

Auðvitað tókst Halldóri Ásgríms og Geir Hilmari að eyðileggja fyrir manni leik Englendinga og Paragvæ í dag. Var alsæll að fylgjast með fyrri hálfleik þegar Þórhallur ræsir mig út til að taka viðtal við stjórnarandstöðuna um ráðherraskiptin, en formenn stjórnarflokkanna voru svo smekklegir að gera þetta í seinni hálfleik. Svo missti ég af leik Svía og Trínidad af því ég þurfti að taka viðtal við nýjan forsætisráðherra. Ekki má svo gleyma því að Halldór hélt miðstjórnarfund sem hófst á sama tíma og opnunarleikurinn. Að mér læðist sá grunur – ja gott ef ég er ekki orðin þess fullviss, að þessu fólki finnist landstjórnin eitthvað merkilegri en heimsmeistaramótið í fóbó! Ég ætla að vona að þetta sé misskilningur hjá mér því fólk með svona brenglaða forgangsröðun á ekki að stjórna svo miklu sem húsfélagi í meðalstórri blokk, hvað þá öllu lýðveldinu.

Er reyndar hissa á því að Framsókn flýtti ekki flokkstjórnarfundinum sínum einsog rætt var um. Það hefði verið í takt við annað að halda hann á sama tíma og úrslitaleikurinn fer fram í Þýskalandi.

Ef eitthvað vit er í þessum nýju ráðherrum láta þeir það verða sitt fyrsta verk að smíða frumvarp sem bannar stjórnmálamönnum að sprikla stjórnlaust á meðan HM er í gangi.

Reyndar mætti ganga lengra og fá smá páskafíling í þetta á meðan á mótinu stendur. Loka bara öllu. Með lögum!

Forrest Gump

2006-06-10T00:38:00.000Z

Hef verið að velta einu fyrir mér. Þegar ég klæðist nýmóðins hlaupaátfitti, alvöru hlaupaskóm og spandexgalla, þá lít ég út einsog forljót geimvera í kafarabúning. Þegar Þóra klæðist samskonar átfitti þá lítur hún út einsog afreksmaður á Olympíuleikum. Hvernig stendur eiginlega á þessu?

Svo hef ég verið að velta öðru fyrir mér. Þegar ég er búin að hlaupa mína 10 kílómetra þá lít ég út einsog afrekmaður á Olympiuleikum. Þegar Þóra er hinsvegar búin með sinn hring þá lítur hún út einsog langlegusjúklingur í andnauð í súrefniskassa á Vífilstöðum. Kannski skiptir lúkkið ekki öllu máli?!?

Nú er ég að komast í almennilega í gang aftur í hlaupunum eftir fremur brösótta tíð síðustu mánuði. Þarf að fara 40 – 50 kílómetra á viku ef markmið sumarsins eiga að nást. Einsog staðan er núna er ég að fara 10 kílómetrana fullhægt, svona miðað við síðasta sumar amk.

Hálft maraþon í ágúst, það er stefnan. Þóra ætlar 10 kílómetrana og úr því að ég er búin að klína þessu á netið þá verður ekki aftur snúið hjá okkur. Helvíti mikið púl framundan með óheyrilegum kaloríubruna. Maður lifandi hvað ég get étið mikið af nammi og viðbjóði næstu vikur án þess að hafa áhyggjur.

Kær kveðja,

Lassi Viren

Árekstrar

2006-06-08T01:22:00.000Z

Árekstrar strax byrjaðir í fameilíunni vegna HM, sem hefst á föstudag. Var víst búin að melda mig í eitthvað ættarfótboltamót á laugardaginn, en fattaði síðan að á sama tíma er MJÖG áríðandi leikur á HM. Það þarf ekki mikla hugarleikfimi til að velja á milli fyrsta leik Englands á mótinu og þess að hópast útá óslétt tún í rigningu með ættingjum Þóru, til að leggja stund á eitthvað sem gæti ekki einusinni kallast fótboltaígildi með góðum vilja. Enda er Þóra og allt hennar slekti ævintýralega hæfileikalaust í knattspyrnu og þekkir varla muninn á takkaskóm og Kínakáli. Þetta lið heldur að rangstaða sé gangtegund hjá íslenska hestinum og að leikkerfið 4-4-2 sé flókið afbrigði af Soduko og ætti því frekar að fá útrás fyrir takmarkaða hreyfigetu sína í brennó á einhverju huggulegu bílastæði í úthverfunum. Þannig að ég segi pass með stóru Péi. Þótt Wayne Rooney sé meiddur hjá Englendingum er ekki þar með sagt að enska liðið sé orðið svo vonlaust að ég fylgist frekar með Sóleyju, Kristínu, Þóru og þeirra ættmennum, hengslast með kauðahreyfingum um völl í aumkunarverðri tilraun til að slæma tá í bolta. Færi frekar ódeyfður í góða ristilspeglun.

Ef nærveru minnar er óskað einhversstaðar á meðan á HM stendur er rétt að benda á miðvikudaginn 21 Júní, klukkan 14. Þá hefst stórleikur Angóla og Iran. Gæti hugsað mér að fórna fyrri hálfleik fyrir einhvern góðan málstað. Kannski!

Það er stríð í Framsókn. Nánast klofinn flokkurinn logar stafna á milli. Stórmenni senda hver öðru tóninn, vantraustsyfirlýsingar fljúga á milli manna og deilt er hart um formann, varaformann, ritara, stefnu, ráðherrastóla og hvenær halda skuli flokksþing. Allir sem vettlingi geta valdið innan framsóknar deila. Nema Kristinn H Gunnarsson! Skyndilega lítur hann út fyrir að vera helsti boðberi friðar, samlyndis og sáttfýsi innan flokksins. Merkilegt.

PR og OR

2006-06-07T00:31:00.000Z

Getur verið:

Að sá sem hannaði útgöngu Halldórs Ásgrímssonar úr pólitík

og

sá sem hannaði útgöngu Ingibjargar sólrúnar úr R listanum

og

skipstjórinn á Titanic

sé einn og sami maðurinn?

----

Verð á hita og rafmagni er óþarflega hátt. Fáir botnuðu nokkuð í Línu net og blessað risarækjueldið er mikil ráðgáta. Orkuveituhúsið fór skvilljónir fram úr áætlun og Alfreð hækkað orkuverð þegar hann átti að lækka það. En hverju er ekki sama! Fimm mínútna orkuveituauglýsingin, þar sem allir líta út fyrir að vera útúrstónd af gleði og taumlausri lyfjaneyslu, strokar út allar syndir. Það hefði verið hægt að hvítþvo Enron með þessari snilld.

Og ræðumaður kvöldsins er.....

2006-06-06T20:24:00.000Z

Sá að JC var að velja Steingrím J besta ræðumann eldhúsdagsumræðna. Þrátt fyrir að ég sé mikill áhugamaður um pólitík, lagði ég ekki í það fyrir mitt litla líf að horfa á eldhúsdaginn. Einfaldlega vegna þess að þar sameinast menn um að gera áhugavert efni, sem stjórnmál eiga að vera, að einhverjum mestu leiðindum sem um getur. En Steingrímur er væntanlega vel að titlinum komin, því á slæmum degi flytur hann mál sitt sköruglegar en flestir aðrir þingmenn. Ég velti því oft fyrir mér hvernig á því standi að fólk sem hefur atvinnu af því að rökræða hugmyndir og þarf að tjá sig nær daglega um öll hugsanleg mál, skuli vart geta haldið stutta ræðu skammlaust. Hversu oft sér maður ekki þingmenn í ræðustól alþingis, stamandi og tafsandi, eða lesandi illskiljanlegan texta af blaði. Fullkomlega blæbrigðalaust. Á meðan restin af þingheimi sefur. Hreint út sagt eru sumir þingmenn ámóta mælskir og skólakrakkar.

Steingrímur flytur mál sitt af sannfæringu og ástríðu. Hann er tilfinningaríkur ræðumaður sem fær fólk til að hlusta. Aðrir mjög góðir eru Össur, Helgi Hjörvar, Ingibjörg Sólrún og Ögmundur. Einnig má nefna Sigurð Kára, Mörð, Bjarna Ben og Þórunni Sveinbjarnardóttur. Davíð Oddsson var svo af sama kaliberi og Steingrímur J.

Hvort þetta ágæta fólk er svo að segja eitthvað af viti er svo annað mál.

Dr Gunna syndrómið, part II

2006-06-04T23:59:00.000Z

Hressileg voru viðbrögðin við síðustu færslu í kommentakerfinu. Greinileg að flestir kannast við heilkennið sem ég skrifa um og kenni við dr Gunna - með réttu eða röngu. Doktorinn sjálfur og Arnar Eggert músíkskríbent sverja reyndar af sér sjúkdóminn í svari til mín. Svo ákaft vísa þeir syndróminu á bug að halda mætti að þar færu upprennandi útvarpsstjörnur af Bylgjunni sem í hjáverkum sinntu störfum í aðdáendaklúbbi Dumbó og Steina og Boney M. Og dyttu inní tilfallandi bakraddarsöng hjá Álftagerðisbræðrum. Kommon drengir, Steely Dan og Paul boring bítillinn McCartney!! Ekki tapa öllu kúlinu á einu bretti:-)

Og þar sem einhverjir fattleysingjar hafa tekið þessu sem dissi á meistarana er rétt að taka fram að þessir tveir menn eru í miklum metum hjá Zygmarri. Flest það sem Arnar Eggert skrifar um tónlist í mogga les ég. Einfaldlega vegna þess að hann veit og kann allt um músík, þótt eðlilega sé ég ekkert alltaf sammála honum. Ástríða fyrir tónlistinni skín í gegn í skrifum hans, sem er tilbreyting frá flatneskju margra annarra skríbenta. Og dr Gunni er náttúrulega maðurinn sem gaf mér margar ánægjustundir með lögum á borð við Grænir frostpinnar, Sóli, Bimbirimbirimbam, Sýrubælið brennur og Öxnadalsheiði. Þá er popppunktur frábært tíví og bloggið hans afburðagott. Auðmjúkur hneigi ég mig í duftið, sest síðan við fótskör meistarans, kyssi tær hans og leggst flatur fyrir allri snilldinni. Takk.

Prumpulagsleiðindin færa honum reyndar gommu af mínusstigum þar sem sonur minn afrekaði að spila laghelvítið tuttuguþúsundsinnum eina útileguhelgina. Og hér nefnum við ekki á nafn sjóræningjann Systu sem mín vegna má rotna í rotþró af sömu ástæðu. Rétt að taka fram, svona til að stilla svívirðingum í kommentakerfinu í hóf, að hér er átt við sögupersónu lagsins en ekki Heiðu sem túlkar hana.

En aftur að dr Gunna heilkenninu. Maður að nafni Óskar Pétur á skemmtilegasta og vandaðasta kommentið. Hann tekur upp þykkjuna fyrir doktorinn, sjálfan sig, Árna Zúra, Andra Frey og fleiri snillinga, og notar meðal annars orðið árás um skrif mín. Hann er í svo mikilli vörn fyrir málstaðinn að hann er komin inní markið, rétt einsog skrif mín hafi verið alvörugefin og djúpþenkjandi ádeila á firringu heilkennishafanna en ekki meinlaus og þreytuleg bloggskrif eftir miðnættið. Ekki er hann nú beint fámáll maður hann Óskar, því hann skrifar heila BA ritgerð um efnið í kommentakerfið mitt í stað þess að segja bara Fuck You, Zygmarr! Auðvitað þykir mér vænt um slíka fyrirhöfn, því manngarmurinn virðist hafa skrifað niður 17 þúsund hljómsveitir í stafrófsröð til að færa sönnur á mál sitt. Drottinn allsherjar gefi að listinn sé kópípeistaður einhverstaðar frá!!! Listinn er reyndar úbersvalur á köflum, því þar má sjá gömul goð á borð við Young goods, Pavement, Wedding present, Television og Jesus and the mary chain. Restin er svo eitthvað popprúnk sem engin fílar:-)

Best að taka frá 15 gígabæt fyrir svörin hér að neðan.

Dr Gunna syndrómið

2006-06-04T01:56:00.000Z

Í dag langar mig að fræða ykkur um drGunna heilkennið. DrGunnasyndrómið er velþekkt fyrirbæri og bráðsmitandi. Karlar á aldursbilinu 18-40 ára eru í sérlegum áhættuhópi, einkum ef þeir stjórna útvarpsþáttum. Einkennin eru nokkur og þessi helst:

1. Smituðum einstaklingi finnst hallærislegt að hlusta á tónlist sem aðrir hlusta á. Hún er óæðri.

2. Ef fleiri en þrír kaupa disk með einhverri hljómsveit, þá kveikir smitaður einstaklingur í sínu eintaki opinberlega og í votta viðurvist.

3. Smitaður einstaklingur hefur þörf fyrir að hlusta á óæðri tónlist og gerir það iðulega en... í felum.

4. Rík þörf fyrir að tala illa um tónlist sem aðrir hlusta á, er sameiginlegt einkenni allra smitaðra einstaklinga.

5. Smitaður einstaklingur “namedroppar” í sífellu óskiljanlegum og óþekktum hljómsveitarnöfnum. Því skrítnari nöfn sem hann nefnir, því öflugri verður fullnægingin sem hann fær. (sjá lista neðar í þessari bloggfærslu.)

6. Allir smitaðir einstaklingar eiga bol með áletruninni I hate Radiohead.

Þekktir einstaklingar með þetta heilkenni eru Gunnar Lárus Hjálmarsson, Arnar Eggert á mogganum, Árni Matt á mogganum, Þossi, Bibbi Curver, Þorgrímur Þráinsson og Ívar Guðmunds á Bylgjunni.

Rétt er að taka fram að ég var sjálfur þungt haldin af þessum kvilla um árabil. Mikil samskipti við bindisklætt fólk í sjónvarpi hefur smám saman læknað mig. 10 daga stórskemmtileg dvöl í Evróvisjónlandi á dögunum, nánast eingöngu með samkynhneigðum körlum, virðist svo endanlega hafa bælt niður þessa tendensa. Enda hlusta hommar ekki á rokk, bara á Barböru Streisand, svo alhæft sé hressilega án allra fordóma að sjálfsögðu.

Ástæðan fyrir því að ég finn fyrir þeirri knýjandi þörf að skrifa um þetta heilkenni, er sú að rokkþátturinn minn á Rás tvö er að fara í frí frammá haustið. Djéskoti hefur mér þótt gaman að sitja inní stúdíó rásar á sunnudögum í vetur og spila þá tónlist sem mér þykir skemmtileg. Rokk frá öllum tímum, af allri gerð og sort - þungt og létt. Tónlist sem allir doktorar Gunnarar þessa heims segjast fyrirlíta, en hlusta á í laumi.

Eftirtaldar sveitir hafa verið fastagestir í þættinum mínum eða því sem næst:

Led Zeppelin
Queens of the stoneage
System of a down
Bítlarnir
Wedding present
Rolling stones
Korn
Nirvana
Nick Cave
AC-DC
Alice in chains
Smiths

Eftirtaldar sveitir hafa ekki heyrst í þættinum, en hefðu gert það ef drGunnaheilkennið hefði ráðið för:

Billy Monkeyface and the blowjobs.
Grænmetisgúrkan slefar
To hell with the statistics
Sporjárn
The old armchair
Dildó and the dodos
Ungfrú hnífskarpur og gamla brýnið
Revenge of the whores outside the old factory with no more paint on it!
Þolli og þjóhnapparnir

Hvorn þáttinn hefðuð þið hlustað á?

Gáfuð börn

2006-06-03T01:25:00.000Z

Vil bara deila því með lesendum að hér í Kórsölunum búa afburðargreind börn. Undrabörn sennilegast. Að mati Þóru er stutt í að Katla verði altalandi
en barnið er rúmlega tveggja mánaða. Þetta metur hún útfrá hljóðum sem barnið gefur stundum frá sér. Að hennar mati kann barnið að greina á milli ábendingarfornafna og framsöguháttar. Þá eru sum hljóðin glettilega lík afturbeygðum fornöfnum með viðskeyttum greini að því er Þóra segir. Mér heyrist þetta reyndar bara vera ungbarnahjal, en í hvert sinn sem ég brydda uppá þeirri kenningu er ég slegin kaldur með þeirri óhrekjanlegu staðreynd að ég kann ekkert í málfræði. Skák og mát.

Engin þarf hinsvegar að velkjast í vafa um að Salka er undrabarn. Hún væri fyrir löngu orðin eldflaugaverkfræðingur með sérþekkingu á fljótandi eldsneyti, ef leikskólinn héldi ekki þessum litabókum og kubbadóti að henni alla daga. Flókin burðarvirkjagreining innan mannvirkjagerðar væri líklega við hennar hæfi, en nei nei, syngjum frekar um tröllskessur og álfamær í álögum. Og sullum soldið í keri líka. Barnalegt.

Í ljósi þess hversu mikil snilligáfa er fólgin í ungviði heimilisins, er nöturlegt til þess að vita að við foreldrarnir erum með greind á við útskorið skóhorn.

Þrjár hugleiðingar

2006-06-01T21:07:00.001Z

Er það boðlegt að helsta sönnunargagn í afar alvarlegum ásökunum manns á hendur stjórnmálaflokki sé tölvupóstur frá konu þar sem fram kemur að hún hafi heyrt einhverju fleygt í heita pottinum?

Geta Bubbi Morthens og Eiríkur Jónsson, fyrrum dv blaðamaður, setið saman í 12 mínútna sjónvarpsspjalli án þess að uppúr sjóði? Semja þeir varanlegan frið? Af hverju vill Bubbi ekki bjóða Eiríki á tónleikana sína? Svar sést í Kastljósi föstudagskvöldið 2. júní.

Og það mikilvægasta:

Guð gefi mér æðruleysi
til að sætta mig við það sem ég fæ ekki breytt,
kjark til að breyta því sem get breytt,
og vit til að greina þar á milli.

Amen

Krútt, eða ekki.

2006-05-31T21:51:00.000Z

Á mínu heimili er nú deilt um hugtakið krúttlegt. Tvö ung börn eru á heimilinu, Salka sem er þriggja ára og Katla sem er ríflega tveggja mánaða. Þær eru mestanpart óskapleg krútt, einstaklega miklar dúllur og alger rassgöt. Deilan á heimilinu snýst svo um það hvort allt sem þessi blessuðu börn gera, sé krúttlegt eða ekki. Að mínum dómi eiga krúttilegheitin sér takmörk, en hér taka ekki allir undir það.

Katla litla liggur oft hér í stofusófanum eða uppí rúmi og skoðar heiminn, skríkir, grenjar eða brosir sínu blíðasta til allra. Á síðasta sólahring hefur hún legið bleyjulaus í stutta stund á báðum stöðum með býsna fyrirsjáanlegum afleiðingum. Afrakstur bleyjuleysisins hefur verið ákaflega sýnilegur, bæði í sófa og rúmi. (Og reyndar tíma og rúmi líka, því bletturinn er stór og lengi að þorna!)

Móðurinni finnst þetta bara sætt og hlær. En hún hlær ein. Þar sem nýbakaðar mæður geta verið óskaplega árásargjarnar þegar þeim finnst vegið að afkvæmum sínum, þori ég ekki fyrir mitt litla líf að nota orðið ógeðslegt yfir það sem gengið hefur á í sófanum mínum. Orðið viðurstyggð fangar hinsvegar prýðilega hughrif mín þegar heilinn vinnur úr upplýsingum af vettvangi, sjónrænt og ekki síður í gegnum þefskynið. Svonalagað á ekkert erindi í stofusófann minn og skiptir engu hvort stykkin koma frá kettinum, Kötlu eða Kölska sjálfum. Þetta er ekki krúttlegt fyrir fimmaura!

Sé fyrir mér að eftirfarandi samskipti eigi sér oft stað á næstu mánuðum:

Þóra: “Simmi, nennirðu að skipta á barninu?”
Simmi: “Nei gerð þú það, þér finnst þetta krúttlegt, ekki mér!”

Ritdómur

2006-05-30T16:02:00.000Z

Í dag lauk langri bið. Loksins fékk ég bókina í hendur sem ég hef beðið óþreyjufullur eftir. Þetta er stór og mikil bók sem ég mæli óhikað með, enda er hún gagnleg, stórfróðleg og á köflum ákaflega spennandi. Spennan er að mestu tilkomin vegna óvæntra ættartengsla sumra söguhetjanna, en einnig spilar inní einkennileg búseta margra þeirra persóna sem um er fjallað. Söguþráðurinn er einfaldur, barnalegur jafnvel, og höfundar verða seint sakaðir um að flíka beittu stílvopni. Áhugafólk um bókmenntalegt kruðerí og flókin stílbrögð verður því vafalítið fyrir vonbrigðum og þeir sem lesa Thor Vilhjálmsson að staðaldri ættu að forðast þessa bók einsog pestina. En þótt stíllinn sé einfaldur er hann þróttmikill. Samhengi textans liggur ljóst fyrir frá fyrstu síðu og komið er beint að kjarna málsins, án málalenginga sem er mikill kostur í svona verki. Áþreifanlegur skortur á einni ákveðinni söguhetju kemur ekki að sök og er það þvert á móti stærsti kostur bókarinnar hversu margar persónur koma fyrir, þótt ekki sé mikið gert til að glæða þær lífi. En einsog svo oft í svona bókmenntaverkum er helsti kosturinn jafnframt einn mesti veikleikinn. Á köflum er nefnilega erfitt að muna öll þessi nöfn, auk þess sem innbyrðis tengsl söguhetjanna eru ekki alltaf ljós. Mikill fjöldi tölustafa er í bókinni og þegar lesandinn hefur áttað sig á innbyrðissamhengi talnanna er sem ný veröld opnist. Símaskráin 2006 fær fimm stjörnur, alveg hiklaust.

Uppboð

2006-05-29T18:28:00.000Z

Ég á inni gríðarlegt magn lítið notaðra sumarfrísdaga. Vegna þess að í nærumhverfi mínu er talsverð andstaða við að ég taki allt það sumarfrí sem ég á rétt á, þá hef ég ákveðið að bjóða þessa daga til sölu. Um er að ræða 15 virka sumarfrísdaga. 10 þeirra eru í gríðargóðu veðri, sól og blíðu, fínir í sumarbústaðinn. Þrír daganna eru sólarlausir en hlýjir. Þeir henta vel til frjálsra ásta og allskyns mótmæla og því eru sérkjör möguleg fyrir flokksbundið fólk í vinstri grænum. Tveir daganna eru svo rigningadagar og fást þeir á hálfvirði, fínir fyrir fluguhnýtingamenn, módelsmiði eða hasshausa svo dæmi séu tekin. (Minnið mig á að kvarta til BSRB vegna rigningardaganna þar sem sumarfrí á undir öllum kringumstæðum að vera í sól.)

Tilboðum hæstbjóðenda tekið án frekari skilyrða.

Að lokum þrjár spurningar:

1. Ræða athafnastjórnmálamenn aldrei um málin sem þeir framkvæma?

2. Gera umræðustjórnmálamenn aldrei neitt nema tala saman?

3. Hvor orðaleppurinn er þreyttari, athafnastjórnmál eða umræðustjórnmál?